አንድ ሚሊዮን ብር የሚያስገኘው የፋና ላምሮት የድምፃውያን የአሸናፊዎች አሸናፊ ውድድር ዛሬ ይካሄዳል

አዲስ አበባ፣ መስከረም 17፣ 2014 (ኤፍ ቢ ሲ) በፋና ቴሌቪዥን ከሚተላለፉት የመዝናኛ ፕሮግራሞች አንዱና ዋነኛው የሆነው ፋና ላምሮት፥ በሚያካሂደው የድምፃውያን ውድድር አንድ ሚሊዮን ብርና የክብር ዋንጫ የሚያስገኘው የ8ኛው ምዕራፍ የአሸናፊዎች አሸናፊ የማጠቃለያ ውድድር ዛሬ ይካሄዳል፡፡

የዝግጅት ክፍሉ ለፋና ዲጂታል ሚዲያ እንደገለጸው፥ በፋና ቴሌቪዥን የፋና ላምሮት ፕሮግራም በቀጥታ ስርጭት የሚተላለፈው የድምፃውያን ውድድር፥ እስከዛሬ 7 የውድድር ምዕራፎችን ያከናወነ ሲሆን፣ የ8ኛው ምዕራፍ የአሸናፊዎች አሸናፊ ውድድር ዛሬ ከ5 ሰዓት ተኩል ጀምሮ በሚካሄደው ፐሮግራም ይጠናቀቃል፡፡

ለኪነ ጥበብ መበልጸግ አስተዋጽኦ እያደረገ ያለው ፋና ብሮድካስቲንግ ኮርፖሬት፥ በየምዕራፉ አሸናፊ ለሆኑ ድምፃውያን 500 ሺ ብር የገንዘብ ሽልማትና በገንዘብ የማይተመን ሙያዊ ድጋፍ ሲሰጥ ቆይቷል።

በፋና ቴሌቪዥን መተላለፍ ከጀመረ ሁለት ዓመታትን ያስቆጠረውና በአገር ውስጥና በውጭ አገር በርካታ ተከታታዮች ያሉት የፋና ላምሮት የድምፃውያን ውድድር በየዓመቱ አራት የውድድር ምዕራፎችን ያካሂዳል፡፡

የአሸናፊዎች አሸናፊ ውድድር ደግሞ ፥ በዓመቱ በተካሄዱ የውድድር ምዕራፎች አሸናፊ የሆኑት ብቻ ተመርጠው ለላቀ ክብርና ሽልማት የሚበቁበት ውድድር ነው፡፡

ለውድድሩ በተቀመጠው ሙያዊ መስፈርት መሰረት፥ ዳኞች በሚሰጡት ድምር ውጤት እና በተመልካቾች የአጭር መልዕክት (ኤስ ኤም አስ) ፥ የተሻለ ውጤት ያመጡ ድምፃውያን ውድድሩን ሲያልፉ፣ ዝቅተኛ ውጤት ያመጣ ተወዳዳሪ በየሳምንቱ ከውድድሩ ይሰናበታል፡፡

አራት ተወዳዳሪዎች የሚሳተፉበትና አንድ ሚሊዮን ብር እና የክብር ዋንጫ የሚያስገኘው ከፍተኛው ውድድር ነው ዛሬ በኤሊያና ሆቴል የሚካሄደው፡፡

ከዝግጅት ክፍሉ ባገኘነው መረጃ መሰረት፥ የፍጻሜ ውድድሩ በሦስት ዙር ነው የሚካሄደው፡፡ የመጀመሪያውና የሁለተኛው ዙር፥ ተወዳዳሪዎች በመረጧቸው ሙዚቃዎች ይወዳደራሉ፡፡ በሦስተኛው ዙር ደግሞ ለዚሁ ተብሎ በተዘጋጀ አዲስ የሙዚቃ ዝግጅት ነው ድምፃውያኑ የሚወዳደሩት፡፡

ይህ የማወዳደሪያ ሙዚቃ በተዋቂ የግጥምና ዜማ ደራሲ የተዘጋጀና ሀገራዊ ይዘት ያለው ዘፈን እንደሆነ ለማወቅ ተችሏል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!