ኃይሌ ሪዞርት በጅማ አገልግሎት መስጠት ጀመረ

አዲስ አበባ፣ ታሕሣሥ 24፣ 2017 (ኤፍ ኤም ሲ) በ1 ነጥብ 7 ቢሊየን ብር ወጪ የተገነባው ኃይሌ ሪዞርት በጅማ ከተማ አገልግሎት መስጠት ጀምሯል።

አንጋፋው አትሌት ኃይሌ ገ/ ስላሴ ÷ ሪዞርቱ በ1 ዓመት ከ 8 ወር ጊዜ ውስጥ መጠናቀቁን ገልፆ ለሪዞርቱ በፍጥነት መጠናቀቅ የጅማ ህዝብ ድጋፍ ከፍተኛ መሆኑን ተናግሯል፡፡

የጅማ ከተማ ከንቲባ አቶ ጠሃ ቀመር ፥ ሪዞርቱ ጅማን የኮንፈረንስ ቱሪዝም ማዕከል ለማድረግ ጉልህ ሚና እንደሚጫወት ተናግረዋል፡፡

በተጨማሪ የሪዞርቱ በፍጥነት መጠናቀቅ ሌሎች ባለሃብቶችንም እንደሚያነቃቃ ከንቲባው ገልፀዋል፡፡

የጅማ ዞን አስተዳዳሪ አቶ ትጃኒ ናስር በበኩላቸው ፥ አትሌት ኃይሌ ገ/ ስላሴ በኢንቨስትመንት ዘርፍ እየሰራ ያለው ስራ እንደ ሩጫው ሁሉ ሀገርን የሚያኮራ መሆኑን ገልፀዋል።

ሪዞርቱ ከሚሰጠው አገልግሎት በተጨማሪ ለከተማውና አካባቢው ወጣቶች የስራ እድል መፍጠሩ ተመላክቷል።

በሙክታር ጠሃ እና አሚና አብደላ