ኢትዮጵያና ጅቡቲ ሽብርተኝነትን ለመዋጋት በትብብር እንደሚሰሩ ገለፁ

አዲስ አበባ፣ ታሕሣሥ 20፣ 2017 (ኤፍ ኤም ሲ) ኢትዮጵያና ጅቡቲ በቀጠናው ሽብርተኝነትን ለመዋጋት በትብብር እንደሚሰሩ ገለፁ፡፡

በውጭ ጉዳይ ሚኒስትር ጌዲዮን ጢሞቲዎስ (ዶ/ር) የተመራ ልዑክ ከጅቡቲ አቻው ጋር በሁለትዮሽ እና ቀጠናዊ ጉዳዮች ላይ ውይይት አድርጓል፡፡

በዚህ ወቅት ጌዲዮን ጢሞቲዎስ (ዶ/ር)÷ ኢትዮጵያና ጅቡቲ የረጅም ዘመን ግንኙነት እንዳላቸው ጠቅሰው፤ ግንኙነታቸው በቀጠናው የመልካም ግንኙነት ምሳሌ መሆኑን አስገንዝበዋል፡፡

ኢትዮጵያ ለቀጠናው ሰላም እና መረጋጋት ከፍተኛ አስተዋፅኦ እያደረገች መሆኑን ገልጸው÷ በቀጠናው የሽብር እንቅስቃሴ እያደረገ የሚገኘውን አል-ሻባብን ለመዋጋት ኢትዮጵያ ቁርጠኛ መሆኗን አረጋግጠዋል፡፡

የጅቡቲ ውጭ ጉዳይ ሚኒስትር መሃሙድ አሊ የሱፍ በበኩላቸው÷ በሀገራቱ መካከል ያለው ወዳጅነት በህዝቦች ቤተሰባዊነት ላይ የተመሰረተ መሆኑን በመጠቆም፣ ይህም ግንኙነት ተጠናክሮ እንደሚቀጥል ገልጸዋል።

ኢትዮጵያ በቀጠናው ሰላም ለማስፈን  እያደረገች ላለው ጥረት አመስግነው÷ ኢትዮጵያ በቀጠናው አል-ሻባብን ለመዋጋት በምታደርገው ጥረት ጅቡቲ ድጋፍ ታደርጋለች ብለዋል፡፡

በተጨማሪም  በውይይቱ የኢትዮጵያ እና ጅቡቲ በኢኮኖሚ፣ በንግድ እና በወደብ አገልግሎቶች ዙሪያ በትብብር ለመስራት የሚያስችል ምክክር ማድረጋቸውን የውጭ ጉዳይ ሚኒስቴር መረጃ ያመላክታል፡፡