ኢትዮ ቴሌኮም የኤሌክትሪክ መኪኖችና የባለሦስት እግር ተሽከርካሪ ዕጣ አወጣ

አዲስ አበባ፣ ሕዳር 12፣ 2017 (ኤፍ ቢ ሲ) ኢትዮ ቴሌኮም የሁለት ቢ.ዋይ.ዲ ዘመናዊ የኤሌክትሪክ መኪኖችንና አንድ ባለ 3 እግር ተሽከርካሪን ዕጣ ለባለእድለኞች አውጥቷል፡፡

ኩባንያው ለፋና ብሮድካስቲንግ ኮርፖሬት በላከው መረጃ በመጀመሪያው ዙር ዕጣ ለወጣላቸው ሁለት የባለ 3 እግር ተሽከርካሪዎች እድለኞች ቁልፍ አስረክቧል፡፡

ኩባንያው 130ኛ ዓመት ክብረ-በዓሉን ምክንያት በማድረግ ከመስከረም 12 ቀን 2017 ዓ.ም. ጀምሮ ለደንበኞች ባዘጋጀው የኢትዮ-130 ሜጋ ፕሮሞና ኢትዮ -131 ላኪ ስሎት ሽልማት መርሐ-ግብር ልዩ ልዩ ሽልማቶችን እያበረከተ ነው፡፡

በዛሬው ዕለትም በኢትዮ-130 ሜጋ ፕሮሞ መርሐ- ግብር አንድ ቢ.ዋይ.ዲ ዘመናዊ የኤሌክትሪክ መኪናና አንድ ባለ 3 እግር ተሽከርካሪ ዕጣን አውጥቷል፡፡

በተጨማሪም በኢትዮ-131 ላኪ ስሎት ሽልማት መርሐ-ግብር አንድ ቢ.ዋይ.ዲ ዘመናዊ የኤሌክትሪክ መኪና ዕጣ አውጥቷል፡፡

ባለፉት ሁለት ወራት 57 ዘመናዊ ስማርት ስልኮችን፣ በየቀኑ እና በየሳምንቱ በድምሩ 4ነጥብ 8 ሚሊየን ብር የቴሌብር ኤሌክትሮኒክስ ገንዘብ እንዲሁም 336ሺህ 557 የሞባይል ጥቅሎችን በአጠቃላይ ዛሬ የሚወጡትን ሽልማቶች ሳያካትት ከ14ነጥብ 34 ሚሊየን ብር በላይ ዋጋ ያላቸውን ሽልማቶች አበርክቷል፡፡

መርሐ- ግብሩ አራት ዘመናዊ የኤሌክትሪክ ተሽከርካሪዎችንና ስድስት ባለ 3 እግር ተሽከርካሪዎችን ጨምሮ ለባለእድለኞች በየቀኑና በየሳምንቱ ልዩ ልዩ ሽልማቶችን እያበረከተ በቀጣይ አራት ተከታታይ ወራት ይዘልቃል ተብሏል፡፡