አዲስ አበባ ከኳላላምፑር ጋር ያላት ግንኙነት ተጠናክሮ ይቀጥላል- ከንቲባ አዳነች

አዲስ አበባ፣ ጥቅምት 25፣ 2017 (ኤፍ ቢ ሲ) የአዲስ አበባን እና ኳላላምፑር ከተሞችን ግንኙነት በይልጥ አጠናክረን ለማስቀጠል እንሠራለን ሲሉ የአዲስ አበባ ከተማ ከንቲባ አዳነች አቤቤ ገለጹ፡፡

ከንቲባ አዳነች “በማሌዥያ ጉብኝታችን የኳላላምፑር ምክትል ከንቲባ ኢስማዲ ቢን ሳኪሪን እና የከተማ አሥተዳደሩ አመራሮች ደማቅ አቀባበል አድርገውልናል” ብለዋል።

በአዲስ አበባ እና ኳላላምፑር ከተሞች መካከል ያለው ዘርፈ-ብዙ ትስስር ተጠናክሮ እንደሚቀጥልም ነው በማኅበራዊ ትሰስር ገጻቸው ባሰፈሩት ጽሑፍ የገለጹት፡፡

በዚሁ መሠረት በተለይም በከተማ ፕላን፣ አረጓዴ ልማት፣ አካባቢ ጥበቃና እንክብካቤ፣ በሕዝብ መናፈሻዎች፣ በኢንቨስትመንት፣ ጤና፣ ንግድ እና ቱሪዝም ዘርፎች ላይ ይበልጥ ተቀራርበው መሥራት በሚችሉባቸው መንገዶች ዙሪያ መወያየታቸውንም ገልጸዋል፡፡

በነበራቸው ጉብኝትም ስማርት የትራፊክ መቆጣጠሪያ ማዕከልን፣ የፐርዲና ቦታኒካል ጋርደንን መጎብኘታቸውንና የአዲስ አበባ ከተማ የማስታወሻ ችግኝ ተከላ ማከናወናቸውን ጠቅሰዋል፡፡

ኳላላምፑርን ለነዋሪዎች ምቹ ለማድረግና በቱሪዝም ልማት እየተከናወነ ያለው የትራንስፎርሜሽን ሥራ የምንማርበት በመሆኑ የሁለቱን ከተሞች ግንኙነት አጠናክረን እንቀጥላልን ብለዋል፡፡