2ኛ ዙር የሻምፒየንስ ሊግ ጨዋታዎች ዛሬ ምሽት ቀጥለው ይደረጋሉ

አዲስ አበባ፣ መስከረም 22፣ 2017 (ኤፍ ቢ ሲ) የአውሮፓ ሻምፒየንስ ሊግ 2ኛ ዙር የሁለተኛ ቀን ጨዋታዎች ዛሬ ምሽት ቀጥለው ሲደረጉ የእንግሊዙ አስቶንቪላ ከረጅም ዓመታት ቆይታ በኋላ ባየርን ሙኒክን ይገጥማል፡፡

ምሽት 1 ሰዓት ከ45 ላይ የስፔኑ ዢሮና ከኔዘርላንድሱ ፌይኑርድ እንዲሁም ሻካታር ዶኔስክ ከአትላንታ ይጫወታሉ፡፡

በሌላ ጨዋታ መርሐ-ግብር ምሽት 4 ሰዓት በርኒንግሃም ላይ የእንግሊዙ አስቶንቪላ ከባየርን ሙኒክ የሚያደርጉት ጨዋታ ተጠባቂ ነው፡፡

በተመሳሳይ ምሽት 4 ሠዓት ላይ የፖርቹጋሉ ቤኔፊካ ከአትሌቲኮ ማድሪድ፣ የክሮሺያው ዳይናሞ ዛግሬብ ከፈረንሳዩ ሞናኮ፣ የፈረንሳዩ ሊል ከሪያል ማድሪድ እንዲሁም ሊቨርፑል ከጣልያኑ ቦሎኛ  ጋር ይጫወታሉ፡፡

በተጨማሪም የጀርመኑ ረቢ ሌብዢግ ከጁቬንቱስ እና የኦስትሪያው ስትሩም ግራዝ ከቤልጂዬሙ ክለብ ብሩጅ በተመሳሳይ ምሽት 4 ሰዓት ላይ ጨዋታቸውን ያደርጋሉ፡፡

ትላንት ምሽት በተደረጉ ተጠባቂ የአውሮፓ ሻምፒየንስ ሊግ ጨዋታዎች አርሰናል ፒኤስጂን 2 ለ 0፣  ባርሴሎና ያንግቦይስን 5 ለ 0፣ ባየርሊቨርኩሰን ኤሲሚላንን 1 ለ 0፣ ቦሩሺያ ዶርቱመንድ ሴልቲክን 7 ለ 1፣ ኢንተር ሚላን ሬድስታር ቤልግሬድን 4 ለ 0 ፣ ማንቼስተር ሲቲ ስሎቫን ብራቲስላቫን 4 ለ 0 እንዲሁም ብረስት ሬድ ቡል ሳልዝበርግን 4 ለ 0 ሲያሸንፉ÷ ፒኤስቪ ከስፖርቲንግ ሊዝበን እና ስቱትጋርት ከስፓርታ ፕራግ ደግሞ 1 ለ 1 አቻ ተለያይተዋል፡፡