ዛሬ ፍጻሜውን በሚያገኘው የአትሌቲክስ ሻምፒዮና ኢትዮጵያውያን የሚጠበቁባቸው ሶስት ውድድሮች ይካሄዳሉ

አዲስ አበባ፣ ነሐሴ 25፣ 2016 (ኤፍ ቢ ሲ) በፔሩ ሊማ ሲካሄድ በነበረውና ዛሬ ምሽት ፍጻሜውን በሚያገኘው የዓለም ከ20 ዓመት በታች አትሌቲክስ ሻምፒዮና ኢትዮጵያውያን አትሌቶች የሚጠበቁባቸው ሶስት ውድድሮች ይካሄዳሉ።

በዚህም በ1 ሺህ 500 ሜትር ሴቶች የፍፃሜ ውድድር አትሌት ሳሮን በርሀ እና ፅጌ ተሾመ ሌሊት 7:00 ላይ ለሜዳሊያ ብርቱ ፉክክር ያደርጋሉ ተብሎ ይጠበቃል።

እንዲሁም በወንዶች 3 ሺህ መሰናክል የፍፃሜ ውድድር አትሌት ሃይሉ አያሌው እና በሪሁን ሞገስ ሌሊት 7:15 ላይ ውድድራቸውን ያካሂዳሉ።

የወንዶች 1 ሺህ 500 ሜትር የፍፃሜ ውድድር ደግሞ አትሌት አብዲሳ ፈይሳ ሌሊት 8:05 ላይ ይወዳደራል።

ኢትዮጵያ እስከ አሁን በሻምፒዮናው በአራት ወርቅ፣ ሁለት ብር እና አንድ ነሀስ በአጠቃላይ በሰባት ሜዳልያ ከአሜሪካ በመቀጠል ከዓለም በሁለተኛ ደረጃ ላይ ትገኛለች።