በአማራ ክልል የአስቸኳይ ጊዜ አዋጁን በመጣስ ልጁን የዳረው ግለሰብ በቁጥጥር ስር ዋለ

የሰሜን ሸዋ ዞን ፖሊስ መምሪያ ኃላፊ ኮማንደር እሸቱ ጌታቸው እንዳሉት በሁሉም የዞኑ አካባቢዎች የሚፈጸሙ ሠርጎችን በማጥናት ሰዎች ሰርጋቸውን እንዲያራዝሙ፣ እንዲያስቀሩ ካልሆነም ደግሞ አዋጁን ሳይጥሱ በቤተሰብ ብቻ እንዲፈጽሙ ደብዳቤ ተጽፏል።

ይሁን እንጂ የፖሊስ አባሉ ሠርጉን እንዳይፈጽም በተደጋጋሚ ቢነገርም “ድግሴ ይበላሽብኛል” በማለት የልጁን ሠርግ መፈጸማቸውን አስታውቀዋል።

የአስቸኳይ ጊዜ አዋጁን ድንጋጌ በመጣሳቸውም በቁጥጥር ስር መዋላቸውን የንዑስ ወረዳው ፖሊስ ጣቢያ ኃላፊ ዋና ኢንስፔክተር በላይነህ ኃይሉ ተናግረዋል።

ፖሊሱ በቁጥጥር ሥር መዋላቸውን ተከትሎም በአካባቢው በርካታ ሠርጎች መቋረጣቸው ታውቋል።

“ወረርሽኝ በሚከሰትበት ጊዜ የፖሊስ አባላት ሊኖራቸው የሚገባውን ቁመና ቢኖርም አዋጁን ጥሶ ድርጊቱን በመፈጸሙ በወታደራዊ ዲስፕሊን እና በአስቸኳይ ጊዜ አዋጁ መሠረት ይጠየቃል” ብለዋል ኮማንደር እሸቱ።

የኮሮና ወረርሽኝ በዞኑ እንዳይስፋፋ በሀገር አቀፍ ደረጃ የተላለፈውን የአስቸኳይ ጊዜ አዋጅ ድንጋጌ ለፀጥታ መዋቅሩ ግንዛቤ በመፍጠር እንዲያስከብር ጥብቅ መመሪያ መተላለፉን በመግለፅ፤ በዚህም መሠረት ሕግ የማስከበር ተግባሩ ተጠናክሮ መቀጠሉን መምሪያ ኃላፊው መናገራቸውን አብመድ ዘግቧል።