Fana: At a Speed of Life!

የወላይታ ዞን ከፍተኛ አመራሮች የስራ መልቀቂያ አስገቡ

0 90

አዲስ አበባ፣ ሰኔ 14፣ 2010 (ኤፍ.ቢ.ሲ) የወላይታ ዞን ከፍተኛ አመራሮች በራሳቸው ፍቃድ ስልጣን ለመልቀቅ ደብዳቤ አስገቡ።

ኃላፊነታቸውን በፈቃዳቸው ለመልቀቅ ደብዳቤ ያስገቡት የወላይታ ዞን ዋና አስተዳዳሪ፣ የዞኑ የደኢህዴን ጽህፈት ቤት ሀላፊ፣ የዞኑ የደኢህዴን የገጠር ፖለቲካ ዘርፍ ሀላፊ፣ የዞኑ ደኢህዴን የከተማ ፖለቲካ ዘርፍ ሀላፊ እና የዞኑ ምክትል አስተዳዳሪ መሆናቸውን የዞኑ ፅህፈት ቤት ለፋና ብሮድካስቲንግ ኮርፖሬት አረጋግጧል።

ከፍተኛ የስራ ሀላፊዎች ስልጣናቸውን በራሳቸው ፍቃድ የለቀቁት በዞኑ ተከስቶ የነበረውን ግጭት ተከትሎ በሰው ህይወት እና በንብረት ላይ ለደረሰው ጉዳት ሀላፊነት ወስደው ስልጣናቸውን እንዲለቁ ጠቅላይ ሚኒስትር ዶክተር አብይ መጠየቃቸውን ተከትሎ መሆኑንም አስታውቀዋል።

የስራ ሀላፊዎቹ ባወጡት መግለጫ፥ በአካባቢው ተፈጥሮ ለነበረው ችግር የመፍትሄ አካል ለመሆን በጠቅላይ ሚኒስትር ዶክተር አብይ የቀረበላቸውን ጥያቄ በፀጋ መቀበላቸውን አስታውቀዋል።

የደኢህዴን እና የክልሉ መንግስት አሰራርን ተከትሎ በቀጣይ አዳዲስ አመራሮች በስፍራቸው እስኪተኩ ድረስ በተመደቡበት ቦታ ሆነው የተሰጣቸውን ኃላፊነት እንደሚወጡ አስታውቀዋል።

ስልጣናቸውን በራሳቸው ፍቃድ መልቀቃቸውን በዛሬው እለት ያስታወቁት የወላይታ ዞን ከፍተኛ አመራሮች ከታህሳስ ወር 2009 ዓ.ም ጀምሮ ነው ወደ ዞኑ ተመድበው በመስራት ላይ የነበሩት።

Comments
Loading...