Fana: At a Speed of Life!

ተመድ ኢትዮጵያና ኤርትራ ግንኙነታቸውን ለማሻሻል ለጀመሩት ስራ የሚያስፈልጋቸውን ድጋፍ ለማድረግ ዝግጁ መሆኑን ገለፀ

የኢትዮጵያና ኤርትራ ግንኙነት

0 158

 

አዲስ አበባ፣ ሰኔ 14፣ 2010 (ኤፍ.ቢ.ሲ) የተባበሩት መንግስታት ድርጅት ኢትዮጵያና ኤርትራ ግንኙነታቸውን ለማሻሻል ለጀመሩት ስራ የሚያስፈልጋቸውን ድጋፍ ሁሉ ለማድረግ ዝግጁ መሆኑን ገለፀ።

የተባበሩት መንግስታት ድርጅት ዋና ጸሃፊ አንቶኒዩ ጉተሬዝ ባወጡት መግለጫ፥ ኢትዮጵያ እና ኤርትራ በመካከላቸው ያለውን ግንኙነት ለማሻሻል የተጀመሩትን በጎ ስራዎች አድንቀዋል።

የኢፌዴሪ ጠቅላይ ሚኒስትር ዶክተር አብይ አህመድ እና የኤርትራው ፕሬዚዳንት ኢሳያስ አፈወርቂ በሀገራቱ መካከል ለረጅም ዓመታት እልባት ሳያገኝ የቆየው ጉዳይ እንዲፈታና የሀገራቱ ግንኙነት እንዲሻሻል ለጀመሩት ስራም ምስጋናቸውን አቅርበዋል።

ኢትዮጵያ እና ኤርትራ ግንኙነታቸውን ለማሻሻል የጀመሩት ስራ በሁለቱ ሀገራት መካከል ሰላምን ከማስፈን በዘለለ ለአፍሪካ ቀንድ ሰላምም አወንታዊ ጠቀሜታ እንዳለው ነው አንቶኒዮ ጉቴሬዝ የገለፁት።

የተባበሩት መንግስታት ድርጅት ኢትዮጵያና ኤርትራ ግንኙነታቸውን ለማሻሻል የጀመሩት ስራ ውጤታማ እንዲሆንም የሚያስፈልጋቸውን ድጋፍ ሁሉ ለማድረግ ዝግጁ መሆኑን ዋና ፀሃፊው አስታውቀዋል።

የአፍሪካ ህብረትም ኢትዮጵያና ኤርትራ በመካከላቸው ያለውን ግንኙነት ለማሻሻል የተጀመሩትን በጎ ስራዎች ማድነቁ ይታወሳል።

የህብረቱ ኮሚሽን ሊቀመንበር ሙሳ ፋቂ መሃመት፥ በሁለቱ ሀገራት መካከል ዘላቂ ሰላም እንዲሰፍን የሚደረገው ጥረት ግቡን እስኪመታ ድረስም የአፍሪካ ህብረት አስፈላጊውን ድጋፍ ለማድረግ ዝግጁ መሆኑን አስታውቀዋል።

የኢህአዴግ ስራ አስፈፃሚ ኮሚቴ ባለፈው ግንቦት ወር መጨረሻ ባካሄደው ስብሰባ የኢትዮ- ኤርትራ ወቅታዊ ሁኔታን በመገምገም፥ ኢትዮጵያ የአልጀርሱን ስምምነትና የድንበር ኮሚሽኑን ውሳኔ ያለ ምንም ቅድመ ሁኔታ ተቀብላ ለመተግበር መስማማቷን መግለጹ ይታወሳል።

ይህን ተከትሎም በኢትዮጵያና ኤርትራ መካከል ተፈጥሮ የቆየው አለመግባባት እንዲያበቃና በሁለቱ ወንድማማች ህዝቦች መካከል ዘላቂ ሰላም እንዲፈጠር ጥሪ ማቅረቡም የሚታወስ ነው።

በዚሁ መሰረት የኤርትራው ፕሬዚዳንት ኢሳያስ አፈወርቂ በትናንትናው እለት፥ ኤርትራ ከኢትዮጵያ ጋር ገንቢ ውይይት የሚያደርግ ከፍተኛ ልዑኳን ወደ አዲስ አበባ እንደምትልክ አስታውቀዋል።

Comments
Loading...