ጋዜጠኛ ሰይፉ ኣለምሰገድ ካብዛ ዓለም ብሞት ተፈሊዩ

ኣዲስ ኣበባ ፣ 26 መጋቢት፣ 2013 (ኤፍ ቢ ሲ)ኣብ ብሮድካስቲንግ ኮርፖሬሽን ኢትጵያ እናሰርሐ ዝነበረ ጋዜጠኛ ሰይፉ ኣለምሰገድ ካብዛ ዓለም ብሞት ተፈሊዩ።

ጋዜጠኛ ሰይፉ ኣለምሰገድ ብዘሓደሮ ሕማም ክትትል ሕክምና እናገበረ ፀኒሑ ኢዩ ትማሊ ኣብ 46 ዕድሚኡ ካብዛ ዓለም ብሞት ተፈሊዩ።

ጋዜጠኛ ሰይፉ ካብ ኣቡኡ ኣይተ ኣለምሰገድ ተስፋሚካኤልን ካብ እንኡ ወይዘሮ ለተብራሃን ገብረዮሃንስን ብ1967 ዓ.ም ኣብ ከተማ መቐለ ተወሊዱ ቀዳማይን ካልኣይን ብርኪ ትምህርቱ ኣብ ቤት ትምህርቲ ሃፀይ ዮሃንስ መቐለ ተማሂሩ ኢዩ።

ቀዳማይ ዲግሪ ትምህርቱ ካብ ዩኒቨርሲቲ ኣዲስ ኣበባ ብጂኦግራፊ ዝረኸበ ጋዜጠኛ ሰይፉ፥ ካልኣይ ዲግሪ ድማ ብቢዝነስ ኣድሜኒስትሬሽን ረኺቡ።

ጋዜጠኛ ሰይፉ ካብ 1995 ዓ.ም ጀሚሩ ኣብ ብሮድካስት ኮርፖሬሽን ኢትዮጵያ ብክፍሊ ቋንቋ ትግሪኛ ካብ ሪፖርተር ክሳብ ክፍሊ መተሓባበሪ ዝሰርሐ እንትኸውን፥ ኣብ ውሽጢ ዝተፈላለዩ ክፍሊታት ስራሕ እቲ ኮርፖሬሽን እውን እናገልገለ ፀኒሑ ኢዩ።

በዓል ሓዳርን ኣቦ ክልተ ቆልዑን ዝነበረ ጋዜጠኛ ሰይፉ፥ ብዘሓደሮ ሕማም ትማሊ 25 መጋቢት 2013 ዓ.ም ካብዛ ዓለም ብሞት ተፈሊዩ ኢዩ።

ስነስርዓት ቀብሩ ድማ ሎሚ መዓልቲ ኣብ ቤተ ክርስቲያን ሰኣሊተ ምሕረት ተፈፂሙ።

እዋናዊን ሓዱሽን ሓበሬታ ንምርካብ

ቴሌግራም ገፅና https://t.me/tigrignafana

ድረ ገፅና https://www.fanabc.com/tigrigna/

ትዊተር ገፅና https://twitter.com/fanatelevision

ዩቲዩብ ቻናል FBC Tigrigna

https://www.youtube.com/c/fanabroadcastingcorporate/ሰብስክራይብ

ይግበሩ/ራ!