ኮሚሽነር ጀነራል ደመላሽ ገ/ሚካኤል ሜዳሊያ ፕሬዚዳንታዊ ትሕብብር ተበርኪቱሎም

ኣዲስ ኣበባ፣ 17 ሕዳር፣ 2017 (ኤፍ ቢ ሲ)ፕሬዚዳንት ሪፐብሊክ ደቡብ ሱዳን ሳልቫኪር ማያርዲት ንኮሚሽነር ጀነራል ፖሊስ ፌዴራል ኢትዮጵያ ደመላሽ ገ/ሚካኤል ሜዳሊያ ፕሬዚዳንታዊ ትሕብብር ኣበርኪተሙሎም።

ኮሚሽነር ጀነራል ደመላሽ ርክብ ፖሊስ ንፖሊስ ክልቲአን ሃገራት ኣብ ምጥንኻርን ዶብ ዘለል ገበናት ኣብ ምክልኻልን ንዘበርከትዎ ኣስተዋፅኦ ኢዩ እቲ ሜዳሊያ ተዋሂቡዎም።

ብተወሳኺ ከይዲ ሪፎርም ፖሊስ ደቡብ ሱዳን ብምድጋፍ ናይቲ ኣገልግሎት ላዕለዎት መኮንናት ዓቕሚ ንምህናፅ ኣብ ዩንቨርስቲ ፖሊስ ኢትዮጵያ ኣብ ዝሃብዎ ዕድላት ትምህርቲን ስልጠናን ኣስተዋፅኦ ከምዝኾነ ኣብ ፖሊስ ፌዴራል ዝረኸብናዮ ሓበሬታ የረድእ።

ኣብቲ ስነ ስርዓት፥ ሚኒስትር ፕሬዚዳንታዊ ጉዳያት እታ ሃገር ኣምባሳደር ቾል ማውት ሓዊሱ ኣምባሳደር ኢትዮጵያ ኣብ ደቡብ ሱዳን ነቢል መሃዲን ኢንስፔክተር ጀነራል ፖሊስ ደቡብ ሱዳን ኣተም ማሮል ተረኺቦም።