ካቢነ እስራኤል ኣብ ሊባኖስ ምቁራፅ ተዅሲ ክግበር ዝቐረበ ስምምዕ ጠሚቱ ክዛተ ኢዩ

ኣዲስ ኣበባ፣ 17 ሕዳር፣ 2017 (ኤፍ ቢ ሲ)ካቢነ ሚኒስትራት እስራኤል ምስ ዕጡቕ ጕጅለ ሒዝቦላህ ዝካየድ ዘሎ ተፃብኦታት ዝምልከት ግዝያዊ ምቁራፅ ተዅሲ ንኽግበር ሎሚ ከምዝራኸብ ተገሊፁ።

እቲ ዝሕሰብ ዘሎ ምቁራፅ ተፃብኦታት ንፈለማ 60 መዓልታት ዝፀንሕ እንትኸውን፥ ምስሓብ ሓይልታት እስራኤል ካብ ሊባኖስ ዘጠቓልል ምዃኑ ፀብፃባት ማዕከናት ዜና ይሕብሩ።

ሕዝቦላህ ብግድኡ፥ ካብቲ ኣህጉራዊ ዶብ ንሰሜን ኣስታት 30 ኪ/ሜ ርሒቑ ካብ ዝርከብ ደቡባዊ ክፋል ሩባ ሊታኒ ጠቕሊሉ ክወፅእን ኣብቲ ከባቢ ሰራዊት ሊባኖስ ክሰፍሩ ከፍቅድን ክሰማማዕ ትፅቢት ይግበር።

ይኹን’ምበር ሐዚ’ውን ኣብ መንጐ ክልቲኦም ወገናት ዝካየድ ብርቱዕ ውግእ ይቕፅል እዩ ዘሎ ተባሂሉ።

ሰበስልጣን ሊባኖስ፡፥ እስራኤል ኣብ ደቡባዊ ሊባኖስ ብዝፈፀመቶ መጥቃዕቲ ነፈርቲ ብውሕዱ 31 ሰባት ከም ዝተቐትሉን ሕዝቦላህ ድማ ናብ እስራኤል ሮኬታት ከም ዝተኰሰን ገሊፆም።

ካቢነ ሚኒስትራት እስራኤል ኣብቲ ሎሚ ሰሉስ ዝካየድ ኣኼባ ነቲ ስምምዕ ድምፆም ክህቡ ትፅቢት ይግበር ክብል ቢቢሲ ፀብፂቡ።

ማዕከን ዜና ሮይተርስ፥ ንሓደ ላዕለዋይ በዓል ስልጣን እስራኤል ብምጥቃስ እቲ ኣኼባ ነቲ ብፅሑፍ ዝቐረበ ስምምዕ ምፅዳቕ ዝዓለመ ከም ዝዀነ ገሊፁ።