እስራኤል ነበርቲ ደቡባዊ ሊባኖስ ካብቲ ከባቢ ብህፁፅ ንክወፅኡ ዳግም ኣተሓሳሲባ

ኣዲስ ኣበባ፣ 23 መስከረም፣ 2017 (ኤፍ ቢ ሲ)እስራኤል ኣብ ዝተመረፁ ትሕዝቶታት ሂዝቦላህ ብነፈርቲ እትፍፅሞ መጥቃዕቲ ተጠናኺሩ ከምዝቕፅል ኣፍሊጣ።

ብመሰረት እዚ ሎሚ መዓልቲ ኣብ ማእኸላዊን ደቡባዊን ቤሩት ዕዉት መጥቃዕቲ ከምዝፈፀመት ሰራዊት ምክልኻል እስራኤል ገሊፁ።

ነዚ ስዒቡ ክሳብ ሐዚ 9 ሰባት ሀይወቶም ዝሰኣኑ እንትኾኑ፥ 14 ሰባት ድማ ጉድኣት ከምዘጋጠሞም ሰብ መዚ ሊባኖስ ኣፍሊጦም።

ብተወሳኺ ሰራዊት እስራኤል ኣብ ደቡባዊ ሊባኖስ ምስ ዕጡቓት ሂዝቦላህ ፊት ንፊት ኲናት ይግብር ከምዘሎ ተሓቢሩ።

በቲ ኲናት 8 ወተሃደራት ከምዝሞትዎ ዝገለፀ ሰራዊት እስራኤል፥ ኣብ ልዕሊ ሂዝቦላህ ዝውሰድ ስጉምቲ ተጠናኺሩ ከምዝቕፅል ኣረጋጊፁ።

ስለዝኾነ ኣብ 25 ከባቢታት ዝርከቡ ነበርቲ ደቡባዊ ሊባኖስ ካብቲ ከባቢ ብህፁፅ ንክወፅኡ ዳግም ሰራዊት አስራኤል ኣተሓሳሲቡ።