ኣብ ኣብያተ ፍርዲ መረፃ ተንከፍ ዝኾኑ ክትዓት ብፍሉይ ኩነታት ንምድናይ ዘኽእል ቅድመ ምድላው ይግበር ኣሎ

ፕሬዚዳንት ላዕለዋይ ቤት ፍርዲ ፌዴራል ወይዘሮ መዓዛ ኣሸናፊ ምስ ላዕለዎት ኣመራርሓታትን ኣተሓባበርቲ ምድብ ችሎትን ሰለስቲኦም ኣብያተ ፍርዲ ፌዴራል፥ መረፃን ተተሓሓዝቲ ሕጊታትን መሰረት ብምግባር ናብቶም ኣብያተ ፍረዲ ዝቐርቡ ዛዕባታት ፀሬት ብዘለዎ ቅልጡፍ ውሳነ ምሃብ ኣብ ዝከኣለሉ ኩነታት ኣድሂበን ዘትየን።

ኣብቲ ዝተሳለጠ መድረኽ ዘተ፥ ምስ መረፃ ተተሓሒዞም ዝቐርቡ ጉዳያት ኣብ ሓፂር እዋን ውሳነ ዘድልዮም ከምዝኾኑ ተገሊፁ።

ምስ ከይዲ መረፃ ተተሓሒዞም ዝቐርቡ ጉዳያት ኣብ ስሩዕ ከይዲ ኣወሃህባ ግልጋሎት ዳይነት እውን ቅልጡፍ መልሲ ምሃብ ከምዝከኣል ምግላፀን ካብ ላዓለዋይ ቤት ፍርዲ ፌዴራል ዝረኸብናዮ ሓበሬታ የረድእ።

እቶም ክፍጠሩ ዝኽእሉ ፀገማት ኣብ ግምት ውሽጢ ብምእታው ኣብ ቅድመ መረፃ፣ እዋን መረፃን ድህረ መረፃን ናብ ኣብያተ ፍርዲ ዝቐርቡ ቅሬታታት ቅልጡፍ፣ ግልፂን ፍትሓዊን ዳይነት ንመሃብ ኣብያተ ፍርዲ ከተግብሩዎም ዝግብኡ ስራሕቲ ብዝምልከት ዘተ ብምክድ ኣንፈት ከምዝተቐመጠ ተሓቢሩ።