ኣብ ምክልኻልን ምቁፅፃርን ኤች ኣይ ቪ/ኤድስ ግደ ማሕበር ወለዶ ምድሓን ትግራይ ዑዙዝ ከምዝኾነ ተገሊፁ

ኣዲስ ኣበባ፣ 28 ሕዳር፣ 2017 (ኤፍ ኤም ሲ)ኣብ ምክልኻልን ምቁፅፃርን ኤች ኣይ ቪ/ኤድስ ግደ ማሕበር ወለዶ ምድሓን ክልል ትግራይ ዑዙዝ ከምዝኾነ ተገሊፁ።

ቢሮ ጥዕና ግዚያዊ ምምሕዳር ክልል ትግራይን ማሕበር ወለዶ ምድሓን ትግራይን ብምትሕብባር መድረኽ ዘተ መዕበይ ግንዛበ ኣሳሊጦም።

መተሓባበሪ ኣውራ ከይዲ ስራሕ ኩለመዳያዊ ስራሕቲ ምክልኻልን ምቑፅፃርን ኤች ኣይ ቪ ኤድስ እቲ ቢሮ ኣይተ ፍሰሃ ብርሃነ፥ ኣብ ትግራይ ዝነበረ ኲናት ዝርግሐ ኤች ኣይ ቪ ኤድስ ኣዝዩ ንክዛመት ምኽኒያት ከምዝኾነ ገሊፆም።

መሰል ኣብ ደሞም እቲ ቫይረስ ዘለዎም ወገናት ብምኽባርን ብምሕብሓብን ዝርግሐ እቲ ሕማም ምክልኻልን ምቁፅፃርን ከምዝከኣል ድማ ሓቢሮም።

ማሕበር ወለዶ ምድሓን ትግራይ ምግላልን ምፅያፍን ኣባና ደው ክብል ብዝሰራሕናዮ ስራሕ ፅቡቅ ውፅኢት ተረኺቡ ነይሩ ዝበላ ኣዶ መንበር ማሕበር ወለዶ ምድሓን ትግራይ ወ/ሮ ህይወት ብርሃነ ብግደአን፥ ብሰንኪ ዝነበረ ኲናት  እቲ ሕማም ክጋደድ ከምዝኸኣለ ኣረዲኤን።

ስለዝኾነ ግዳይ እቲ ቫይረስ ንዝኾኑ ወገናትና ኣብ ምሕብሓብ ክንሰርሕ ኢና ኢለን።