ኢትዮጵያ ብብርኪ ዓለም ልዑል ዓቕሚ ምፍራይ መዓር ካብ ዘለወን 10 ሃገራት ሓንቲ ኢያ-ቀዳማይ ሚኒስትር ኣቢይ ኣሕመድ(ዶ/ር)

ኣዲስ ኣበባ፣ 2 ጳጉሜን፣ 2015 (ኤፍ ቢ ሲ)ኢትዮጵያ ብብርኪ ዓለም ልዑል ዓቕሚ ምፍራይ መዓር ካብ ዘለወን 10 ሃገራት ሓንቲ ኢያ ክብሉ ቀዳማይ ሚኒስትር ኣቢይ ኣሕመድ(ዶ/ር) ገሊፆም።

እቶም ቀዳማይ ሚኒስትር ኣብ ማሕበራዊ ሚዲየኦም ኣብ ዘመሓላለፍዎ መልእኽቲ፥ ኣብ ዝሓለፉ ዓማውቲ ዝጀመርናዮ ስራሕቲ ዘበናዊ ብልሓት  ትልሚ ‘የሌማት ትሩፋት’ ኣብ ስራሕ ብምውዓል ፍሪያታት መዓር ኣብ ዓመት ናብ 98 ሺሕ ቶን ክብ ምባል ክኢልና ኢና ኢሎም።

ኢትዮጵያ ዝተፈላለዩ እፅዋት ዝወነነት ሃገር ብምዃናን ዝተፈላለዩ ስነ ምህዳራዊን ኩነታት ከባቢ ኣየርን ንፍሪያት መዓር ምቹእ ስለዝገብርዋ ነዚ ኣብ ግምት ብምእታው ናይ ቀፃሊ ዓመት ትልሚታት ዓመታዊ ፍሪያት ብዕፅፊ ምዕባይ ከምዝኾነ ተዛሪቦም።

ሐዚ እውን ንዝሓሸ ፍሪያት እንገብሮ ፃዕሪ ሓቢርና ነጠናኽር ኢሎም።