ቤተ ክርስቲያን ኦርቶዶክስ ተዋህዶ ኣብ ዝተፈላለዩ ከባቢታት ኢትዮጵያ ኣብ ልዕሊ ንፁሃን ዜጋታት ዝፍፀም መጥቃዕቲ ኮኒና

ምልኣተ ጉባኤ ቅዱስ ሲኖዶስ ኣብ ዓመታዊ ኣኼቡኡ እናሃለወ ነቲ ፍፃመ ከምዝሰምዖ ዝሓበሩ እቶም ፓትሪያርክ፥ እቲ ተግባር ንሲኖዶስን ቤተክርስቲያንን ኣዚዩ ዘሕዘነ ኢ-ሰብኣዊ ተግባር ከምዝኾነ ገሊፆም።

“ቤተክርስቲያን ኦርቶዶክስ ተዋህዶ ኣድላዪ ብዘይኮነ ምኽንያት ብግፍዒ ንዝተቐተሉን ህይወቶም ንዝሰኣኑን ወገናት ልባዊ ሓዘና ትገልፅ” ኢሎም።

መላእ ኢትዮጵያውያን ድማ ከም ሓሳብ እግዚኣብሄር ኩሉ ሰብ ጋሻ እዛ ዓለም ምዃኖም ብምግንዛብ ብሕውነት፣ ብፍቕሪ፣ ብሓድነትን ብምትሕስሳብን ፈጣሪ ኣብ ዝሃቦም መሬት ንኽነብሩ ፃውዒት ኣቕሪቦም።

ከምዚ ዓይነት ኢ-ስባኣዊ ተግባር ዳግም ከይፍፀም፥ መንግስቲ ንዜጋታቱ ኣድላዪ ዘበለ ሓለዋ ክገብር ከምዝግባእን ገበነኛታት ናብ ፍርዲ ንኸቕርብን ሓቲቶም።

ኩሎም ኢትዮጵያውያን ኣብ ናይ ሓባር ሰላምን ሓድነትን ጠጠው ንኽብሉ ፃውዒት ምቕራቡ ካብ ቤተ ክርስቲያን ኦርቶዶክስ ኢትዮጵያ ዝረኸብናዮ ሓበሬታ የረድእ።

እዋናዊን ሓዱሽን ሓበሬታ ንምርካብ ናይ ቴሌግራም ገፅና ሰብስክራይብ ይግበሩ/ራ!
https://t.me/tigrignafana