ባንኪ ዓለም ንዓውዲ ጥዕና ዝገብሮ ደገፍ ንከጠናኽር ተሓቲቱ

ኣዲስ ኣበባ፣ 13 ሕዳር፣ 2017 (ኤፍ ቢ ሲ)ሚኒስትር ጥዕና ዶ/ር መቅደስ ዳባ ምስ ሓዳሽ ተሸያሚት ካንትሪ ዳይሬክተር ባንኪ ዓለም ሚሪያም ሳሊም ዘቲየን።

እቲ ዘተ፥ ኣብ ዓውዲ ጥዕና ሓቢርካ ምስራሕ ኣብ ዘኽእሉ ዛዕባታት ጠመተ ዝገበረ ከምዝኾነ ተገሊፁ።

ዶ/ር መቅደስ ዳባ፥ ኢትዮጵያ ብለበዳ ኮቪድ-19 ይኹን ኣብ እዋን ኲናት ደገፍ ባንኪ ዓለም ከምዘይተፈለያ ኣዘኻኺረን።

ምትሕብባር ሚኒስቴር ጥዕናን ባንኪ ዓለምን ኣጀንዳ ዓውዲ ጥዕና ብቕልጡፍ ንምውሳድ ከምዘኽኣለ ገሊፀን።

ምስ ባንኪ ዓለም ብምትሕብባር ዝስርሑ ዘለዉ ገዘፍቲ ፕሮጀክትታት ሓዊሱ ኣብ ዓውዲ ጥዕና ዘስርሑ ዘለዉ ስራሕቲ ብህፁፅ ንምፍፃም ዘሎ ድልውነት ኣብሪሀን።

እተን ሚኒስትር፥ ባንኪ ዓለም ንዓውዲ ጥዕና ዝገብሮ ደገፍ ንከጠናኽር ሓቲተን።

ሚሪያም ሳሊም ብግደአን፥ ሚኒስቴር ጥዕና ብፍላይ ጥዕና ኣዴታትን ህፃናትን ኣብ ምምሕያሽ ዝተመዝገበ ውፅኢት ንኢደን።