በዓል መስቀል ብዘይፀገም ፀፅታ ንምኽባር ዘኽእል ምድላው ተዛዚሙ-ሓበራዊ ግብረ ሓይሊ

ኣዲስ ኣበባ፣ 8 መስከረም፣ 2016 (ኤፍ ቢ ሲ)በዓል መስቀል ብዘይፀገም ፀፅታ ንምኽባር ዘኽእል ምድላው ከምዝተዛዘመ ሓበራዊ ግብረ ሓይሊ ፀፅታን ድሕንነትን ኣፍሊጡ።

ኣከባብራ እቲ በዓል ጠመተ ብምግባር፥ ኣባላት እቲ ግብረ ሓይሊን መራሕቲ ሃይማኖትን መድረኽ ዘተ ኣሳሊጦም።

ምክትል ኮሚሽነር ጀነራል ኣዛዚ ላዕለዋይ መምርሒ ምክልኻል ገበን ፖሊስ ፌዴራል ኢትዮጵያ መላኩ ፋንታ፥ በዓል መስቀል ብዘይፀገም ፀፅታ ንምኽባር ሓይሊታት ፀፅታ ስነምግባር ዝሓለወ ሓላፍነቶም ንምውፃእ ብምትላም በቢብርኩ ንዝርከቡ ኣመራርሓታትን ኣባላትን መብርሂ ከምዝተውሃበ ተዛሪቦም።

እቲ በዓል ጉልባብ ብምግባር ኣጀንዳታት ፖለቲካ ምንዛሕ ግቡእ ከምዘይኮነ ብምግንዛብ ጎንፂ ዝውልዑ ፅሑፋትን ዝኾነ ህውከት ዝፈጥር ነገርን ኣብቲ በዓል ዝካየደሉ ከባቢ ሒዝካ ምምፃእ ዝተኸልከለ ኢዩ ኢሎም።

ነዚ ብምጥሓስ ዝንቀሳቐሱ ኣካላት እንተተረኺቦም ሕጋዊ ስጉምቲ ከምዝውሰድ ምግንዛቦም ኣብ ፖሊስ ፌዴራል ዝረኸብናዮ ሓበሬታ የረድእ።