ሞሮኮ ምልክት ዓበቕ ህበይ ዝተርኣዮም ሰለስተ ሰባት ምርካባ ገሊፃ

ኣዲስ ኣበባ፣ 16 ግንቦት፣ 2014 (ኤፍ ቢ ሲ)ሞሮኮ ምልክት ዓበቕ ህበይ ዝተርኣዮም ሰለስተ ሰባት ከምዝተረኸቡ ሚኒስቴር ጥዕና እታ ሃገር ኣፍሊጡ።

እቶም ምልክት ተራኢዩዎም ዝተብሃሉ ሰባት ኣብዚ ሕዚ እዋን ክትትል ሕክምና እናተገበረሎም እንትኸውን፥ ኣብ ፅቡቕ ኩነታት ጥዕና ከምዝርከቡ እውን እቲ ሚኒስቴር ገሊፁ።

ምስ እዚ ተተሓሒዙ ድማ ተወሰኽቲ ምርመራታት ብምግባር ውፅኢት እናተፀበዩ ከምዝኾኑ ተሓቢሩ።

እቲ ሚኒስቴር ምልክታት ዓበቕ ህበይ ምርኣዩ ስዒቡ ኩነታት ዝከታተል ፍሉይ ግብረ ሓይሊ ተጣይሹ ክብል ሺንዋ ፀብፂቡ።

ውድብ ጥዕና ዓለም ኣብ ኣሜሪካ፣ ካናዳ፣ ኣውስትራሊያ፣ ብሪታኒያ፣ ስፔን፣ ፖርቱጋል፣ ጀርመን፣ ቤልጂየም፣ ጣሊያን፣ ኔዘርላንድስ፣ ፈረንሳይን ስዊድንን ሓዊሱ ኣብ 21 ሃገራት ሕማም ዓበቕ ህበይ ከምዝተርኣየ ምግላፁ ይፍለጥ።