ምምሕዳር ከተማ ኣዲስ ኣበባ ሽልማት ፎረም ኢንቨስትመንት ስማርት ከተማታት ኣፍሪካ ተበርኪቱሉ

ኣዲስ ኣበባ፣ 13 ሕዳር፣ 2017 (ኤፍ ቢ ሲ)ምምሕዳር ከተማ ኣዲስ ኣበባ ሽልማት ፎረም ኢንቨስትመንት ስማርት ከተማታት ኣፍሪካ ተበርኪቱሉ።

እቲ ሽልማት ብልምዓት ኮሪደር ከተማ ኣዲስ ኣበባ ንነበርታን ንኣጋይሻን ምችውቲን ትስማዕማዕን ንምግባር ኣብ ሓፂር እዋን ዝተረኸበ ዘዕግብን ውፅኢታዊ ተግባር መሰረት ብምግባር ኣብ ሓምለዋይ ኣሰር ፅዕንቶ ክሌማዊ ለውጢ ንምንካይ እናተተግበረ ዝርከብ ተምሳሌታዊ ተግባር ብምድሃብ ከምዝኾነ ተገሊፁ፡፡

ካብዚ ብተወሳኺ “ሰብ ተኮር ስማርት ከተማታት ንህንፀት ትውልዲ” ብዝብል ሓሳብ ኣብታ ከተማ ተግባራዊ ምግባሩን ዘበናዊን ምችውቲን ከተማ ንምፍጣር ናይ እግረኛን ሞተር ኣልቦን ተሽከርከርቲ መገዲታት ደረጃኦም ሓሊዮም ምህናፆም መሰረት ብምግባር ከምዝኾነ እውን ኣብቲ ስነ-ስርዓት ሽልማት ተሓቢሩ፡፡

ንከንቲባ ኣዳነች ኣቤቤ ብምውካል ኣብ ኬንያ ናይሮቢ ተረኺቦም እቲ ሽልማት ዝተቐበሉ ኣይተ መኮንን ያኢ÷ እቲ ሽልማት ንዝበለፀ ስራሕ ዘለዓዕል ብምዃኑ እቲ ሽልማት ንዘሰናድኡ ኣካላት ብሽም ህዝቢ ምምሕዳር ከተማ ኣዲስ ኣበባን ምስጋና ምቕራቦም ሓበሬታ ቤት ፅሕፈት ከንቲባ የመላኽት፡፡