ኣብ ትግራይ ወፍሪ ክትባት መከላኸሊ ካንሰር ኣፍ ደገ ማህፀን ኣብ ወርሒ ሕዳር ክወሃብ ኢዩ

ኣዲስ ኣበባ፣ 6 ሕዳር፣ 2017 (ኤፍ ቢ ሲ) ኣብ ክልል ትግራይ ዕድመአን ካብ 9 ክሳብ 14 ንዝኾና ኣዋልድ ወፍሪ ክትባት መከላኸሊ ሕማም መንሽሮ (ካንሰር) ኣፍ ደገ ማህፀን ክወሃብ ኢዩ።

እቲ ክታበት፥ ካብ 9 ክሳብ 13 ሕዳር 2017 ዓ.ም ከምዝወሃብ ቢሮ ጥዕና ግዚያዊ ምምሕዳር ክክል ትግራይ ኣፍሊጡ።

ምክትል ሓላፊ ቢሮ ጥዕና ትግራይ ዶክተር ሪአ ኢሳያስ፥ ሚኒስቴር ጥዕና ፣ ቢሮ ጥዕና ክልል ትግራይ፣ ቢሮ ትምህርቲ፣ ዩኒሴፍን ካልኦትን ብሓባር ብምዃን ኣብ ዝተፈላለየ ወረዳታት እቲ ክልል ወፍሪ መከላኸሊ ክታበት መንሽሮ ኣፍ ደገ ማህፀን ክካየድ እዩ ኢሎም።

ሕማም መንሽሮ ኣፍ ደገ ማህፀን ካብ ሕማም መንሽሮ ጡብ ቀፂሉ ንደቂ ኣንስትዩ ምኽንያት ሕማምን ሞትን ከምዝኾነ እውን ኣብሪሆም።

ብወፍሪ ኣብ ኣብያተ ትምህርቲ ዝወሃብ እንትኸውን፥ ካብ መኣዲ ትምህርቲ ወፃኢ ዘለዋ ድማ ኣብ ትካላት ጥዕናን ግዚያዊ ክታበት ዝወሃበሉ ናቑጣታትን ክወሃብ እዩ ተባሂሉ።