ኣብ ኣፋፍኖት ሰላም ኮይና ነኽብሮ ዘለና ብዓል ኣሸንዳ ቀፃሊ ሓዱሽ ዓመት ናብ ሙሉእ ሰላም ከምዝሰጋገር እምነት ኣለኒ – ሌ/ጀነራል ፃድቃን ገ/ትንሳኤ

ኣዲስ ኣበባ፣ 17 ነሓሰ፣ 2015 (ኤፍ ቢ ሲ)”ኣብ ኣፋፍኖት ሰላም ኮይና ነኽብሮ ዘለና ብዓል ኣሸንዳ ቀፃሊ ሓዱሽ ዓመት ናብ ሙሉእ ሰላም ከምዝሰጋገር እምነት ኣለኒ” ክብሉ ምክትል ርእሰ ምምሕዳር ግዝያዊ ምምሕዳር ክልል ትግራይ ሌፍተናል ጀነራል ፃድቃን ገብረትንሳኤ ገሊፆም።

እቶም ምክትል ርእሰ ምምሕዳር ግዝያዊ ምምሕዳር÷ “ኣሸንዳ ንሕውየትን ዳግመ ህንፀትን ትግራይ” ብዝብል መሪሕ ቃል ኣብ ከተማ መቐለ ስታዲየም ባሎኒ ኣብ ዝተኸበረ በዓል ኣሸንዳ፣ ዓይኒዋሪን ማርያን ተረኺቦም መልእኽቲ ኣመሓላሊፎም።

ኣብ መልእኽቶም ድማ “በዓል ኣሸንዳ እዚ ዓመት ኣብ ውሱን ኣፋፍኖት ሰላም ኮይና ነኽብሮ ዘለና በዓል እዩ” ኢሎም።

“እንቕበሎ ሓዱሽ ዓመት ብምሉእነት ሰላም ከምንቕበሎ ተስፋ ይገብር” ዝበሉ ሌተናል ጀነራል ፃድቃን ገ/ትንሳኤ÷ ደቂ ኣንስትዮ ትግራይ ሰላም ንኽቕፅል፣ ልምዓትን ክረጋገፅን መሰል ንኽኽበርን ኣብ ምስራሕ ኣስተዋፅኦ ንኽገብራ ኣብሪሆም።

ሌተናል ጀነራል ፃድቃን ንዑዱማት ኣጋይሽ ኣብ ዘሕለፍዎ መልእኽቲ÷ ትግራይ ሐዚ ዘላቶ ኣፋፍኖት ሰላም ሙሉእ ንኽኸውን ኣብ ጎድኒ ህዝቢ ትግራይ ክኾኑ ፀዊዖም።

ከንቲባ ምምሕዳር ከተማ መቐለ ኣይተ ይትባረክ ኣመሃ ብወገኖም÷ ውዕሊ ፕሪቶርያ ብምሉእነት ክትግበርን ተመዛበልቲ ናብ መረበቶም ክምለሱ መንግስቲ ፌደራል ክሰርሕ ፀዊዖም።

ኣይተ ይትባረክ÷ ሰብ ሃፍቲ እቲ ሐዚ ተረኺቡ ዘሎ ውሱን ሰላም ተጠቒሞም ኣብታ ከተማ መዋእለ ንዋዮም ከዋፍሩ ፃውዒት ብምቕራብ፤ ምምሕዳር እታ ከተማ ንሰብሃፍቲ ዘድሊ ድጋፍ ከምዝገብር ኣረጋጊፆም።

እቲ ኣብ ስታዲየም ባሎኒ ዝተኸበረ በዓል ኣሸንዳ፣ ማርያን ዓይኒዋሪን÷ ካብ መንግስቲ ፌዴራል ሚኒስተር ባህልን ቱሪዝምን፣ ካብ ብሄራዊ ክልላዊ መንግስቲ ኦሮምያ ዝመፁ መንግስታዊ ኣካላትን ወከልቲ ህዝቢ ኣባገዳታትን ተረኺቦም።

#Ethiopia

እዋናዊ ሓበሬታ ንምርካብ፦

ቴሌግራም ገፅናhttps://t.e/tigrignafana

ድረ ገፅና https://www.fanabc.com/tigrigna/

ትዊተር ገፅና https://twitter.com/fanatelevision

ዩቲዩብ ቻናል FBC Tigrigna https://www.youtube.com/…

ሓዱሽ መተግበሪ ፋና ብሮድካስቲንግ ኮርፖሬት https://play.google.com