ኣሜሪካ ኣብ ክሊ ግድብ ህዳሰ ዝግበር ድርድር እተን ተደራደርቲ ሃገራት ባዕለን መፍትሒ ንኸቕምጣ ጥራሕ ሓገዝ ትገብር – ማይክ ፖምፔዮ

ኣይተ ገዱ ኣብቲ እዋን መግለፂ ኣብ ግድብ ህዳሰ ኣድሂቦም ኣብ ዝሃቡዎ መብርሂ፥ ኢትዮጵያ፣ ሱዳንን ግብፂን ኣብቲ ግድብ ዝገብረኦ ድርድር ብሄራዊ ረብሓ ኢትዮጵያ ብዝሓለወ መልክዑ ኣብ ስምምዕነት ክበፅሓ ኢየን ዝብል እምነት ከምዘለዎም ገሊፆም።

ኣይተ ገዱ፥ እተን ሃገራት ኣብ ስምምዕነት ንኽበፅሓ ኣሜሪካን ባንኪ ዓለምን እናተፃወቱ ዝርከቡ ኣወንታዊ ግደ እውን ኣመስጊኖም።

ሚኒስትር ጉዳያት ወፃኢ ኣሜሪካ ማይክ ፖምፔዮ ብግደኦም፥ ኢትዮጵያን ኣሜሪካን ምዕቡል ምሕዝነት ምዃነን ገሊፆም።

ርክብ ክልቲአን ሃገራት ብዝበለፀ ተጠናኺሩ ንኽቕፅል ሃገሮም ኣበርቲዓ ከምትሰርሕ እውን ኣፍሊጦም።

ዋሸንግተን ኣብ ኢትዮጵያ እናተኻየዱ ዝርከቡ ስራሕቲ ሪፎርም ከምትድግፍ እውን ኣብቲ ዝሃቡዎ መግለፂ ኣረጋጊፆም።

ብተወሳኺ ኣሜሪካ ኣብዚ ሕዚ እዋን ኣብ ምብራቕ ኣፍሪካ ተላዒሉ ዘሎ ዕስለ ኣምበጣ ንምክልኻል፥ 8 ሚሊየን ዶላር ኣሜሪካ ሓገዝ ከምትገብር ዕላዊ ገይሮም።