ሚኒስትራት ጉዳያት ወፃኢ ኢትዮጵያ፣ ሱዳንን ግብፂን ኣብ ክሊ ግድብ ህዳሰ ኣብ ዋሸንግተን ክዛተዩ ኢዮም

ሎሚ መዓልቲን ፅባሕን ኣብ ዝሳለጥ ኣኼባ፥ ኣብ ረቂቕ ሰነድ ስምምዕነት ኣመላልኣን ኣሳድዳን ማይ ግድብ ህዳሰ ኢትዮጵያ ዘድሃበ ዘተ ክምዝካየድ ሚኒስትር ማይ፣ መስኖን ኢነርጂን ፌዴሪኢ ዶ/ር ኢንጅነር ስለሽ በቀለ ትማሊ ኣብ ማሕበራ ሚዲያ ትዊተር ገፆም ኣፍሊጦም።

ረቂቕ ሰነድ ስምምዕነት ኣመላልኣን ኣሳድዳን ማይ ግድብ ህዳሰ ኢትዮጵያ፥ ቅድሚ ሕዚ ብብርኪ ቴክኒክ ዝተገበሩ ድርድራት ብዝተረኸበ ውፅኢት መሰረት ብምግባር ዝተዳለወ ምዃኑ እውን እቶም ሚኒስትር ገሊፆም።

ብርኪ ኣመላልኣን ኣሳድዳን ማይ፣ እቲ ግድብ ክሕዞ ዝግበኦ መጠን ማይ፣ ኣመሓዳድራ ድርቂን እዋን ድርቂን ከምኡ እውን ምልውዋጥ ሓበሬታን ኣሰራርሓ ምትሕብባር ብብርኪ ቴክኒክ ዝተገሩ ድርድራት ዝተረኸቡ ውፅኢታት ኢዮም ተባሂሉ።

ሰለስቲአን ሃገራት ቅድሚ 10 መዓልቲ ኣብ ግድብ ህዳሰ ኣድሂበን ኣብ ዋሸንግተን ዲሲ ዝገበረኦ ዘተ ብፅቡቕ ውፅኢት ምዝዛመን ይዝከር።

ነዚ ስዒቡ ድማ ሰብ ሞያታት ቴክኒክን ሕጊን ዝተሳተፉሉ ናይ መወዳእታ ረቂቕ ሰነድ ስምምዕነት ኣመላልኣን ኣሳድዳን ማይ ግድብ ህዳሰ ንምድላው፥ ኣብ ዝሓለፈ ሰሙን ኣብ ሱዳን ካርቱም ተራኺቦም ኢዮም።