ዓመታዊ ክብረ በዓል ሕዳር ፅዮን ብዝለዓለ ድምቀት ይኽበር ኣሎ

ኣዲስ ኣበባ፣ 21 ሕዳር፣ 2017 (ኤፍ ቢ ሲ)ዓመታዊ ክብረ በዓል ሕዳር ፅዮን ብዝለዓለ ድምቀት ይኽበር ኣሎ።

ሃይማኖታዊ በዓል ሕዳር ፅዮን ንምኽባር ናብ ከተማ ኣክሱም ዝኸዱ ኣጋይሽ ካብ ትማሊ ጀሚሩ ኣቀባብላ ይግበረሎም ምንባሩ ይዝከር።

ኣብቲ ብዝለዓለ ድምቀት ሎሚ መዓልቲ ዝኽበር ዘሎ ሃይማኖታዊ በዓል ሕዳር ፅዮን ንምስታፍ  ናብታ ከተማ ዝኣትዉ ቁፅሮም ብርክት ዝበሉ ኣጋይሽ ስነስርዓት ምሕፃብ እግሪ ተኻይዱሎም ኢዩ።

እቲ ስነስርዓት ካብ ቀደም ዝፀንሐ እንትኸውን፥ ቀንዲ ምኽንያት እቲ ሕፅበት ድማ ናብዚ ዝተቐደሰ ስፍራ ዝመፅኡ ኣጋይሽ ብኽብሪ ተቐቢልካ ኣኽቢርካ ምስናይ ከምዝኾነ ይግለፅ።

እቶም ኣጋይሽ ድሕሪ እግሮም ምሕፃብ ንከዕርፉሎም ተባሂሉ ናብ ዝተሰርሑ ዳሳት ኣምሪሖም።

ሎሚ መዓልቲ ድማ ላዕለዎት ሓለፍቲ ስራሕ ግዚያዊ ምምሕዳር ክልል ትግራይ ሓዊሱ፥ ብርክት ዝበሉ ሰዓብቲ እምነት ኦርቶቶክስ ሃይማኖት፣ ኣቦታት ሃይማኖት፣ ዓበይቲ ዓዲ ኣብ ዝተረኸብሉ ብድምቀት ይኽበር ኣሎ።

ብተወሳኺ ካብ ዝተፈላለዩ ከባቢታት ኢትዮጵያን ወፃኢ ዓዲን  ዝመፅኡ ኣጋይሽ ኣብቲ በዓል ተረኺቦም።