ወራር ዕስለ ኣንበጣ ንምክልኻል ብፕሬዚደንት ግዝያዊ ምምሕዳር ዝምራሕ ሓይሊ ዕማም ብምጥያሽ ስራሕ ከምዝጀመረ ተገሊፁ
ኣዲስ ኣበባ፣ 7 ነሓሰ፣ 2015 (ኤፍ ቢ ሲ)ኣብ ክልል ትግራይ ኣጋጢሙ ዘሎ ወራር ዕስለ ኣንበጣ ንምክልኻል ብርእሰ ምምሕዳር ግዚያዊ ምምሕዳር ዝምራሕ ሓይሊ ዕማም ብምጥያሽ ስራሕ ከምዝጀመረ ተገሊፁ።
ርእሰ ምምሕዳር ግዚያዊ ምምሕዳር ክልል ትግራይ ኣይተ ጌታቸው ረዳ ሎሚ ኣብ ዝሃብዎ መግለፂ÷ ኣብ ዞባታት ምብራቕ፣ ደቡብ ምብራቕን ደቡብን ትግራይ ሓያል ዕስለ ኣንበጣ ከምዘሎ ኣብሪሆም።
ኣይተ ጌታቸው ረዳ ከም ዝሓበርዎ÷ ኣብ ትግራይ ኣጋጢሙ ዘሎ ወራር ኣንበጣ ንምክልኻል ዘኽእል ሓይሊ ዕማም ተጣይሹ ናብ ስራሕ ክኣቱ ተገይሩ ኣሎ።
እዚ ሓይሊ ዕማም ምክልኻል ኣንበጣ÷ ብርክት ዝበላ ኣብያተ ዕዮታት ግዚያዊ ምምሕዳር ዝሓቖፈ ከምዝኾነን ናይ ባዕሉ ትልሚ ኣውፅኡ ናብ ተግባር ክኣቱ ኣንፈት ከምዝተነፀረን ገሊፆም።
ዕስለ ኣንበጣ ኣብ ዝተርኣየሎም ሰለስተ ዞባታት ብዝተጠናኸረን ብዝተወደበን መንገዲ ምክልኻል እናተገበረ ምዃኑ ዝሓበሩ ኣይተ ጌታቸው÷ ህዝቢ ዞባታት ምብራቕ፣ ደቡብ ምብራቕን ደቡብን ዘካይዶ ንዘሎ ዝተወደበ ምክልኻል ዘለዎም ናእዳ ገሊፆም።
“ዕስለ ኣንበጣ ኣብ ቀፃሊ እውን ስፍሓቱን መጠኑን ክውስኽ ስለዝኽእል ካብ ላዕሊ ክሳብ ታሕቲ ዘሎ መሪሕነት ቀንዲ ውራዩ ምክልኻል እዚ ዕስለ ክኸውን ኣለዎ” ክብሉ ኣገንዚቦም።
እቲ ሕዚ ተራኢዩ ዘሎ ይኹን ቀፂሉ ክመፅእ ዝኽእል ዕስለ ኣንበጣ ብዝግባእ ንምክልኻ ምስ መንግስቲ ፌዴራል ተሓባቢርካ ምስራሕ ከምዘድሊ ዝሓበሩ እቶም ርእሰ ምምሕዳር÷ ማሕበረሰብ ዓለም እኹል ድጋፍ ንኽገብር ከምዝስራሕ ምግላፆም ቤት ፅሕፈት ጉዳያት ኮሙዩኒኬሽን እቲ ግዚያዊ ምምሕዳር ዝረኸብናዮ ሓበሬታ የረድእ።
እዋናዊ ሓበሬታ ንምርካብ፦
ቴሌግራም ገፅናhttps://t.e/tigrignafana
ድረ ገፅና https://www.fanabc.com/tigrigna/
ትዊተር ገፅና https://twitter.com/fanatelevision
ዩቲዩብ ቻናል FBC Tigrigna https://www.youtube.com/…
ሓዱሽ መተግበሪ ፋና ብሮድካስቲንግ ኮርፖሬት https://play.google.com