ኣይተ ደመቀ መኮንን ምስ ሚኒስትር ጉዳያት ወፃኢ ጋቦን ተዛቲዮም

ኣዲስ ኣበባ፣ 12 መስከረም፣ 2014(ኤፍ ቢ ሲ)ምክትል ቀዳማ ሚኒስትር ሚኒስትር ጉዳያት ወጻኢን ኣይተ ደመቀ መኮንን ምስ ሚኒስትር ጉዳያት ወፃኢ ጋቦን ፓኮሜ ሞቤሌት ቡቤያ ኣብ ኒውዮርክ ተራኺቦም ተዛቲዮም።

ኣብ ክልተዊ ርክብ ኢትዮጵያን ጋቦንን፣ ኣህጉራዊን ዓለም ለኸ ጉዳያትን ኣድሂቦም ከምዝተዛተዩ ተገሊፁ።

ጋቦን ኣብ ቀረባ እዋን ኣባል ቤት ምኽሪ ፀፅታ ውድብ ሕቡራት መንግስታት ምዃና ስዒቡ፥ ንኣፍሪካውያን ድምፂ ብምዃን ግደኣ ከምትዋፃእ እምነቶም ከምዝኾነ ኣይተ ደመቀ መኮንን ገሊፆም።

ቤት ምኽሪ ፀፅታ ኣብ ቀርኒ ኣፍሪካ ዘለዎ ትኹረት ካብ እዋን ናብ እዋን እናወሰኸ ምምፅኡ ብምሕባር፥ ኣፍሪካዊ ፀገማት ብኣፍሪካውያን መፍትሒ ክረኽቡ ንምግባር ዝግበር ፃዕሪ ተጠናኺሩ ክቕፅል ከምዝግባእ ተዛሪቦም።

ኣብ መወዳእታ ድማ ኢትዮጵያን ጋቦንን ክልተኣዊ ርክበን ብዝበለፀ ንምጥንኻር ብወገን መንግስቲ ኢትዮጵያ ዘሎ ቆራፅነት ምርግጋፆም ካብ ቤት ጽሕፈት ምክትል ቀዳማይ ሚኒስትር ዝረኸብናዮ ሓበሬታ የረድእ።