ኣብ ትሕዝቶኦም ንምልማዕ ሕቶ ዘቕረቡ 31 ሓረስቶት ተፈቒዱሎም

ኣዲስ ኣበባ፣ 23 ታሕሳስ፣ 2017 (ኤፍ ኤም ሲ)ኣብ ናይ ባዕሎም ትሕዝቶ ንከልምዑ ሕዞ ዘቕረቡ 31 ሓረስቶት ንኸልምዑ ከምዝተወሰነ ቢሮ ልምዓት መሬትን ምምሕዳርን ከተማ ኣዲስ ኣበባ ኣፍሊጡ፡፡

ምስ ዕቤት እታ ከተማ ሓቢሮም ክዓብዩ እናተገበኦም በቲ ልምዓት እናተደፍኡ ዝነበሩ ኣብታ ከተማ ዝርከቡ ሓረስቶት ሕቶኦም ንምምላስ እናተሰርሐ ምዃኑ እቲ ቢሮ ገሊፁ፡፡

ብለውጢ መንግስቲ ሓረስቶት ኣብ ዝሓዙዎ ትሕዝቶ መሬት ርእሶም ክኢሎም ንኸልምዑ ወይ እውን ብሓባር ምልማዕ ንኽኽእሉ ብሕጊ መሰል ከምዝተውሃበ ዘዘኻኸረ እቲ ቢሮ፤ በዚ መሰረት እስትራቴጂክ ካውንስል እቲ ቢሮ ኣብ ትሕዝቶኦም ናይ ምልማዕ ሕቶ ንዘቕረቡ 31 ሓረስቶት ምላሽ ተዋሂቡ።

ብምዃኑ ድማ እቶም ሓረስቶት ኣብ 16 ነጥቢ 75 ሔክታር ኣብ ኣገልግሎታት ሕርሻ፣ ንግዲን ዝተፈላለዩ ማሕበራዊ ኣገልግሎታትን ንኽዋፈሩ ወሲኑ ተባሂሉ፡፡