ኣምባሳደር ሬድዋን ሑሴን ምስ ሶማሊያ መዘነኦም ተዛቲዮም

ኣዲስ ኣበባ፣ 15 ታሕሳስ፣ 2017 (ኤፍ ኤም ሲ)ዳይሬክተር ጄኔራል ብሄራዊ ኣገልግሎት ሓበሬታን ድሕንነትን ኣምባሳደር ሬድዋን ሑሴን ምስ ሶማሊያ መዘነኦም ኣብዱላሂ ሞሃመድ ኣብ ዝተፈላለዩ ጉዳያት ተዛቲዮም፡፡

ኣምባሳደር ሬድዋን ኣብ ማሕበራዊ ሚዲያ ገፆም ኣብ ዘመሓላለፉዎ ፅሑፍ፥ ክልቲኦም ላዕለዎት ሓለፍቲ ስራሕ ፀገማት ብሓባር ኣብ ዝፈትሑሎም ጉዳያት፣ ኣብ ዘለዉዎም ዕድላትን ቀፃሊ ጉዕዞን ጠሚቶም ተዛቲዮም፡፡

ስምምዕነት ኣንካራ ተግባራዊ ምስ ምግባር ተተሓሒዙ ካብ መዘና ትካላት ክልቲአን ሃገራት ትፅቢት ኣብ ዝግበሩ ምትሕብባርን ምትሕግጋዝን ኣመልኪቶም ከምዝተዛተዩ እቲ ኣገልግሎት ንፋና ሚዲያ ኮርፖሬሽን ኣብ ዝለኣኾ ሓበሬታ ኣመልኪቱ፡፡

ኣብቲ እዋን ዘተ ትካላት ድሕንነትን ፀፅታን ኢትዮጵያን ሶማሊያን እቲ ስምምዕነት ተግባራዊ ከይኸውን ዕንቅፋት ዝፈጥሩ ኣካላት ንምክልኻ ትፀቢት ዝግበረሎም ግደ ንምውፃእ ኣብ ሓበራዊ ምርድዳእ ከምዝበፅሑን ብፍላይ ኣብ ልውውጥ ሓሬታ ኣንፈት ከምዝተቐመጠን ተገሊፁ፡፡

ግብረ ራዕዲ ኣልሸባብ ሕዚ እውን ኣብ ዞባ ምብራቕ ኣፍሪካ ፍልፍል ስግኣት ከምዝኾነን ላዕለዎት ኣመራርሓ ትካላት ድሕንነትን ፀፅታን ኢትዮጵያን ሶማሊያን ኣብቲ እዋን ዘተ ኣልዒሎም፡፡