ረቂቕ ኣዋጅ ስርዓት ርክብ መንግስታት ፌዴራልን ክልልን ዳግም ንኽረአ ተወሲኑ

እቲ ረቂቕ ኣዋጅ፥ መንግስታት ክልል ዘለዉዎም ስልጣንን ተግባርን ብዘይዳፋእ መልክዑ ንኽቀራረቡን ናይ ሓባር ትልሚ ሓንፂፆም ንኽንቀሳቐሱን ዝሕግዝ ኢዩ ተባሂሉ።

ኣብ ሞንጎ መንግስታትን ተዛመድቲ ትካላትን ዝህሉ ኣብ መርህ ዝተደረኸ ጥንኩር ስርዓት ምትሕብባር ከምዝፈጥር እውን ተገሊፁ።

ኣብቲ ረቂቕ ኣዋጅ ምምሕዳር ከተማታት ኣዲስ ኣበባን ድሬዳዋን ከም ክልል ምፅረሐን ኣግባብ ከምዘይኮነ እቶም ተዛተይቲ ሓቢሮም።

ምኽንያቱ ድማ ግዳማዊ ርክብ ክልል መንግስታትን ተዋረዳዊ ርክብ መንግስታት ፌዴራልን ክልልን ይምልከት ኢዩ ምስ ዝብል ክፋል ናይቲ ረቂቕ ዝጓነፅ ምዃኑ ኣብሪሆም።

መንግስቲ ክልልን ፌዴራልን ብማዕረ ዓይኒ ናይ ምቕራብ ሚዛኑ ግልፅነት ከምዝጎድሎ ዝገለፁ እቶም ተዛተይቲ፥ ደምቢ ዘውፅእ ኣካል ተፈልዩ ዘይምቕማጡ ድማ ምሉእነት እቲ ረቂቕ ጎደሎ ከምዝገብሮ ኣብሪሆም።

እቲ ረቂቕ ኣዋጅ ምምሕያሽ ሕገ-መንግስቲ ምስተገበረ ይፅደቕ ዝብል ሓሳብ ተላዒሉ ዘተ ዝተገበረ እንትኸውን፥ ምስ ተሞክሮ ካልኦት ሃገራት እንትነፃፀር ኢትዮጵያ ኣብ መዳይ ምርቃቕ እቲ ሕጊ ምድንጓያ ብምሕባር ውሳነ ንኽወሃበሉ ተሓቲቱ።

“መንግስታት ብዝህብዎም ውሳነታት መድረኽ ብ3/4 ድምፂ ይፅደቕ” ኣብ ዝብል፥ ኣብ ተግባራዊነት ዘይተረኸቡ ኣባላት እቲ መድረኽ ብዝምልከት ዝተቐመጠ ሓሳብ ግልፅነት ይጎድሎ ኢዩ ተባሂሉ።

ካብዚ ሓሊፉ እቲ ረቂቕ ኣገዳዲ ምዃኑን ዘይምዃኑን ብዝምልከት ሕቶታት ተላዒሎም ዘተ ዝተገበረሎም እንትኸውን፥ ዳግም ተራእዩ ተመሓይሹ ንኽቐርብ ከምዝተወሰነ ካብ ግዜኢ ዝረኸብናዮ ሓበሬታ የረድእ።