መበል 45 ዓመት በዓል 11 ለካቲት ኣብ ዴማ ማርዋ ተኸቢሩ

እቲ ዝተገበረ ቓልሲ፥ ትግራይ ከም ብሄር ይቐፅል ዶስ? ይብረስ? ንዝብሉ ክልተ ጫፋትን ወጠርቲ ሕቶታትን መሰረት ገይሩ ዝተጀመረ ከምዝኾነ መበገሲ ቃልሲን ዕላማ 11 ለካቲትን ኣመልኪቶም ኣብ ዝሃቡዎ መብርሂ ገሊፆም።

ገዛእቲ ደርብታት ህዝቢ ትግራይ ርእሱ ከድንን እንተይገበርካን እንተየዳኸምካን ኣንዊሕኻ ምግዛእ ኣይከኣልን ኢሎም፥ ብኹሉ ዓቕሞም ከምዝዘመቱን ህወሓት ድማ ብድሩት ዓቕማ ህዝቢ ኣብ ጎና ኣሰሊፋ ከምዝመከተቶምን ድሌቶምን ዕላምኦምን ከምዘምከነቶን እውን እቶም ነባር ተጋዳላይ ኣብሪሆም።

“ንሶም ዝበልዎ ዘይኮነስ ንሕና ዝበልናዮ ኮይኑ፤ ህዝቢ ትግራይ ከም ብሄር ቀፂሉ፣ ከም ብሄር ቀፂሉ ጥራሕ ዘይኮነስ ነዛ ሃገር ዝዋሓስ ስርዓት ፈጢሩ ኢዩ” ዝበሉ ኣይተ ስብሓት፥ “ርዝነት ናይቲ ቓልሲ ብመንፅር ምቕፃል ሃለዋትን ምጥፋእን ህዝብና ገይርና እንተመዚንናዮ እዩ ዓወቱን ውፅኢቱን ከም ብሄር ነስተማቕሮ” ኢሎም።

ኣበዚ ሕዚ እዋን ገጢሙ ዘሎ ዳግም ህልውና ናይ ምርግጋፅ መድረኽ፥ ከምቲ ልሙድ ኣብ ስጡም ሓድነት ብዝምስረት ቃልሲ ከምዝሰዓርን እዚ ንምግባር ድማ ሓድነት ህዝቢ ትግራይን ሓበራዊ ቃልስን ከምዘድሊ ኣተሓሳሲቦም።

ፍልፍል፦ ወይን ጋዜጣ