አዲስ አበባ፣ ጳጉሜን 5፣ 2013 (ኤፍ ቢ ሲ) መሰረታዊ የውትድርና ስልጠናቸውን አጠናቀው በወሎ ግንባር በኩል ወደ ሰራዊቱ ለተቀላቀሉ የቁርጥ ቀን ልጆች የጀግና አቀባበል ተደረገላቸው ።
በአቀባበል ስነ-ስርአቱ ላይ ተገኝተው መልእክት ያስተላለፉት የግንባሩ ከፍተኛ የጦር አዛዥ እንዳሉት ፥ ጠላት በሰራዊታችን በተወሰደበት ከፍተኛ እርምጃ እየተደመሰሰ ሲሆን የወረራቸውን መሬቶች እየለቀቀ በመሸሽ ላይ ይገኛል ብለዋል።
ዛሬ እናንተም ለህዝባችን ድል የምታበስሩ የታሪክ ባለ አደራዎች ናችሁ ሲሉ ተናግረዋል።
የምናደርገው ጦርነት ሃገርና ህዝብን ከመበታተን የሚታደግ ፍትሃዊ ጦርነት በመሆኑ የምንጊዜም የድሉ ባለቤቶች እናንተ ናችሁ ብለዋል።
የግንባሩ ክፍለጦር አዛዥ በበኩላቸው፥ በከፍተኛ እልህና ወኔ እየተዋጋ የጠላትን ከንቱ ምኞት ካመከነ ነባር ሰራዊት ስትቀላቀሉ በዋናነት ተዋግቶ ለመሞት ሳይሆን በወታደራዊ ጥበብና ስልት እየተመራችሁ አሸባሪን ወግቶ ለማጥፋት ነው ሲሉ አሳስበዋል።
የክፍለጦሩ ምክትል አዛዥ በበኩላቸው፥ ሃገራዊ ጠላታችን የህውሓት ቡድን በሰራዊታችን መራራ ተጋድሎ ከፍተኛ ውድቀትና ኪሳራ ደርሶበት ግብአተ መሬቱ በሚፈፀምበት ወቅት ላይ ሰራዊታችንን በመቀላቀላችሁ እንኳን ደስ ያላችሁ ማለታቸውን ከመከላከያ ሰራዊት የፌስ ቡክ ገጽ ያገኘነው መረጃ ያመላክታል።
ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!