አዲስ አበባ፣ ሕዳር 19፣ 2017 (ኤፍ ቢ ሲ)በናይጄሪያ አቡጃ እየተካሄደ በሚገኘው 2ኛው የመላ አፍሪካ ጦር ሃይሎች ስፖርት ፌስቲቫል በ3 ሺህ ሜትር መሠናክል ሃምሳ አለቃ ወርቅውሃ ጌታቸው የወርቅ ሜዳሊያ አግኝታለች።
በዚህም አትሌቷ ለመከላከያው መቻል ስድስተኛ፤ ለራሷ ደግሞ ሁለተኛውን የወርቅ ሜዳሊያ ማስመዝገብ ችላለች።
ከፍተኛ ፉክክር በታየበት የ3 ሺህ መሠናክል ውድድር የመቻሏ አስር አለቃ ባአለምላይ ሹመት 2ኛ በመሆን ውድድሩን አጠናቅቃለች።
ኢትዮጵያን በመወከል በስፖርት ፌስቲቫሉ እየተካፈለ የሚገኘው የመከላከያው መቻል ስፖርት ክለብ በውድድሩ 6 ወርቅ፣7 ብር እና 2 ነሐስ በአጠቃላይ 15 ሜዳሊያዎችን በመያዝ ውድድሩን መቀጠሉን የመከላከያ ሰራዊት መረጃ ያመላክታል።