አትሌት ብዙነሽ ታደሰ የወርቅ ሜዳሊያ አገኘች

አዲስ አበባ፣ ሕዳር 17፣ 2017 (ኤፍ ቢ ሲ) በናይጄሪያ አቡጃ እየተካሄደ በሚገኘው 2ኛው የመላው አፍሪካ የጦር ሀይሎች ስፖርት ፌስቲቫል ኢትዮጵያን የወከለው የመቻል ስፓርት ክለብ አትሌቲክስ ቡድን ሁለተኛውን የወርቅ ሜዳሊያ በጦር ውርወራ ማግኘት ችሏል።

የኢትዮጵያ መከላከያ ዛሬ ፍፃሜያቸውን ባገኙ የተለያዩ ውድድሮች ተጨማሪ አራት ሜዳሊያዎችን ማግኘት ችሏል።

በጦር ውርወራ ሴት በተደረገው የፍፃሜ ውድድር አስር አለቃ አትሌት ብዙነሽ ታደሰ ለሀገሯ የወርቅ ሜዳሊያ ስታስገኝ በወንዶች የጦር ውርወራ ፍፃሜ ምክትል አስር አለቃ አትሌት ኡታጌ ኡጉላ ሁለተኛ በመውጣት የብር ሜዳሊያ አግኝቷል።

በ400 ሜትር ሴቶች ፍፃሜ ምክትል አስር አለቃ አትሌት ራሄል ተስፋዬ፤ በ5 ሺህ ሜትር የወንዶች ፍፃሜ ውድድር ምክትል አስር አለቃ አትሌት መሠረት ሙሉ ሶስተኛ ደረጃን ይዘው በማጠናቀቅ የነሀስ ሜዳሊያ ተሸላሚ ሆነዋል፡፡

እስካሁን ባለው ውድድር በአጠቃላይ የመቻል ስፖርት ክለብ ሁለት ወርቅ፣ አምስት ብርና ሁለት ነሀስ በድምሩ ዘጠኝ ሜዳሊያ ማግኘት ችሏል።