ብልጽግና ፓርቲ ህብረ ብሔራዊ አንድነት እንዲረጋገጥ ሰርቷል – አቶ ደስታ ሌዳሞ

አዲስ አበባ፣ ሕዳር 17፣ 2017 (ኤፍ ቢ ሲ) ብልጽግና ፓርቲ ህብረ ብሔራዊ አንድነት እንዲረጋገጥ መጠነ ሰፊ ስራዎችን ሰርቷል ሲሉ የሲዳማ ክልል ርዕሰ መስተዳድር ደስታ ሌዳሞ ገለጹ፡፡

‘የሀሳብ ልዕልና ለሁለንተናዊ ብልጽግና’ በሚል መሪ ሀሳብ የብልጽግና ፓርቲ 5ኛ ዓመት ምስረታ በዓል በሀዋሳ ከተማ በተለያዩ ዝግጅቶች በክልለል ደረጃ ተከብሯል፡፡

ርዕሰ መስተዳደሩ በወቅቱ ባደረጉት ንግግር÷ ፓርቲው ህብረ ብሔራዊ አንድነት እንዲረጋገጥ መጠነ ሰፊ ስራዎችን እንደሰራ ገልጸዋል፡፡

ፓርቲው ለሲዳማ ልዩ ዕድል ያጎናጸፈ መሆኑን ለአብነት አንስተው፤ ባለፉት 5 ዓመታት ውስጣዊና ውጫዊ ፈተናዎች ቢያጋጥሙም ጫናዎችን በጽናት በመሻገር ተጨባጭ የብልጽግና መሠረት እየጣለ የሚገኝ ፓርቲ ነው ብለዋል።

በዲፕሎማሲው ረገድ የሀገርን ክብርና ጥቅም የሚያስጠብቁ እና የውጭ ጫናን ለመከላከል የሚያስችሉ ተግባራት ተከናውነዋል ማለታቸውን የክልሉ ኮሙኒኬሽን መረጃ አመላክቷል።

ምርታማነትን ማሳደግ የሚያስችሉ ስትራቴጂዎችን በመከተል ገበያ ተኮር የግብርና ምርቶችን በማምረት አበረታች ውጤቶች መመዝገባቸውንም ተናግረዋል።