ሊቨርፑል ከሳወዝሃምፕተን እንዲሁም ማንቼስተር ዩናይትድ ከኢፕስዊች ጨዋታቸውን ያደርጋሉ

አዲስ አበባ፣ ሕዳር 15፣ 2017 (ኤፍ ቢ ሲ) የእንግሊዝ 12ኛ ሳምንት የፕሪሚየር ሊግ መርሃ ግብሮች ዛሬም ቀጥለው ሲካሄዱ ሊቨርፑል ከሳወዝሃምፕተን እንዲሁም ማንቼስተር ዩናይትድ ከኢፕስዊች ታውን ጨዋታቸውን ያደርጋሉ፡፡

የሊጉ መሪ ሊቨርፑል ቀን 11 ሰዓት ላይ ወደ ሴንት ሜሪ ስታዲየም አቅንቶ ሳውዝሃምፐተንን ይገጥማል፡፡

በሊቨርፑል በኩል አሌክሳንደር አርኖልድ፣ ዲያጎ ጆታ፣ አሊሰን ቤከር እና ፍሬደሪኮ ኪየዛ በጉዳት ምክንያት በዛሬው ጨዋታ እንደማይሰለፉ የተገለፀ ሲሆን ባንፃሩ ሃርቬይ ኤሊዮት እና ኮኖር ብራድሌይ ከጉዳት መልስ እንደሚሰለፉ ተገልጿል፡፡

በሳውዝሃምፐተን በኩል ግብ ጠባቂው አሮን ራምስዴል እና አማካዩ ጃን ቤድናሬክ በዛሬው ጨዋታ አይሰለፉም፡፡

በተመሳሳይ ማንቼስተር ዩናይትድ ከአዲስ አዳጊው ኢፕስዊች ታውን ጋር ምሽት 1 ሰዓት ከ30 ላይ ጨዋታውን ሲያደርግ ፖርቹጋላዊው አሰልጣኝ ሩበን አሞሪም ለመጀመሪያ ጊዜ ቡድኑን በአሰልጣኝነት ይመራሉ፡፡

በጨዋታው ለረጅም ጊዜ ጉዳት ላይ የቆዩት ሉክ ሾው፣ ትሬል ማላሲያ፣ ሃሪ ማጓየር፣ ኮቢ ሚያኖ እና ሌኒ ዮሮ እንደማይሰለፉ ሲረጋገጥ በአንፃሩ ሊሳንድሮ ማርቲኔዝ፣ ካዝሜሮ እና ቪክቶር ሊንደሎፍ ይሰለፋሉ ተብሏል፡፡

ማንቼስተር ዩናይትድ ከዛሬ በፊት ካደረጋቸው አምስት ጨዋታዎች አራቱን አሸንፏል።

ሊጉን ሊቨርፑል በ28 ነጥብ ሲመራ፣ ማንቼስተር ሲቲ በ23 ነጥብ ሁለተኛ እንዲሁም ቼልሲ፣ አርሰናል እና ብራይተን በጎል ክፍያ ተበላለጠው እኩል 22 ነጥብ በመያዝ ከሶስተኛ እስከ አምስተኛ ያለውን ደረጃ ይዘዋል፡፡