አዲስ አበባ፣ ሕዳር 14፣ 2017 (ኤፍ ቢ ሲ) ብሔራዊ የጥራት መሠረተ ልማት በዓለም አቀፍ መድረክ ተወዳዳሪ ሆነን እንድንዘልቅ የሚያስችለን ተቋም ነው ሲሉ ጠቅላይ ሚኒስትር ዐቢይ አሕመድ (ዶ/ር) ገለጹ፡፡
ጠቅላይ ሚኒስትሩ በማህበራዊ ትስስር ገጻቸው ባሰፈሩት ጽሑፍ ÷የ‘ጥራት መንደርን’ ዛሬ በይፋ ከመመረቃቸው ቀደም ብለው የተገነባውን ብሔራዊ የጥራት መሠረተ ልማት በትናንትናው ዕለት መጎብኝታቸውን ተናግረዋል፡፡
ይህ ወሳኝ ተቋም የሀገር ውስጥ ምርቶች በዓለም ገበያ የሚኖራቸውን ተወዳዳሪነት በማላቅ በዓለም የእሴት ሰንሰለት የሚኖራቸውን ተሳትፎ የሚያጎለብት ነው ብለዋል፡፡
ከኢትዮጵያ መሪ ተቋማት አንዱ በመሆን የውጭ ንግድ አቅሞቻችንን በማጠናከር በዓለም አቀፍ መድረክ ተወዳዳሪ ሆነን እንድንዘልቅ ያስችለናል ሲሉም ገልጸዋል፡፡