ፔፕ ጓርዲዮላ በማቺስተር ሲቲ ለመቆየት ተስማማ

አዲስ አበባ፣ ሕዳር 11፣ 2017 (ኤፍ ቢ ሲ) የማንቼስተር ሲቲ አሰልጣኝ ጆሴፍ ፔፕ ጓርዲዮላ በክለቡ ለቀጣይ አንድ ዓመት የሚያቆየውን የውል ማራዘሚያ ለመፈረም መስማማቱ ተነገረ፡፡

የ53 ዓመቱ ስፔናዊ አሰልጣኝ በፈረንጆቹ 2016 ማንቼስተር ሲቲን ከተቀላቀል ወዲህ ስድስት የፕሪሚየር ሊግ ዋንጫዎችን ጨምሮ 18 ዋንጫዎችን አሳክቷል፡፡

በእንግሊዝ እግር ኳስ አዲስ አብዮትን እንደፈጠረ የሚነገርለት ስፔናዊ አሰልጣኝ በማንቼስተር ሲቲ ያለው ነባር ውል በመጪው ክረምት የሚጠናቀቅ በመሆኑ ክለቡ በአንድ ዓመት ማራዘሙ ተጠቁሟል፡፡

ፔፕ ከማንቼስተር ዩናይትድ በመቀጠል በአንድ የውድድር ዓመት ፕሪሚየር ሊግ፣ ፍኤ ዋንጫ እና ሻምፒዮንስ ሊግ ዋንጫዎችን በፈረንጆቹ 2022/23 የውድድር ዘመን በማንሳት ደማቅ ታሪክ አስመዝግቧል፡፡

እንዲሁም በአራት ተከታታይ አመታት የእንግሊዝ ፕሪሚየር ሊግ ዋንጫዎችን በማሸነፍ አዲስ ክብረወሰን የያዘ ሲሆን በፔፕ ጓርዲዮላ መሪነት ማንቸስተር ሲቲ በአንድ የውድድር አመት 100 ነጥቦችን በመሰብሰብም የመጀመሪያው ክለብ መሆኑን ቢቢሲ በዘገባው አስታውሷል፡፡