አዲስ አበባ በየዕለቱ ለውጥ እያሳየች ነው – የዴንማርክ አምባሳደር

አዲስ አበባ፣ ሕዳር 10፣ 2017 (ኤፍ ቢ ሲ) አዲስ አበባ ውብ ገጽታ የሚያላብሷትን ለውጦች በየዕለቱ እያስመዘገበች ነው ሲሉ በኢትዮጵያ የዴንማርክ ዕጩ አምባሳደር ሱኔ ክሮግስትሮፕ ገለጹ።

ኢትዮጵያ በአረንጓዴ ዐሻራ መርሐ-ግብር ያሳየችውን ቁርጠኝነት÷ ጽዱና ምቹ የመኖሪያ አካባቢ እውን በማድረግ እየደገመችው መሆኗንም ከፋና ብሮድካስቲንግ ኮርፖሬት ጋር በነበራቸው ቆይታ ተናግረዋል፡፡

የኮሪደር ልማት ተግባራቱ ለሌሎች ሀገራት አርዓያ እንደሚሆኑ ጠቅሰው÷ “አዲስ አበባ መሽቶ በነጋ ቁጥር ማራኪ ገጽታ ተላብሳ የምታገኛት ከተማ ሆናለች” ሲሉ አድናቆታቸውን ገልጸዋል።

ዴንማርክ ለኢትዮጵያ አረንጓዴ ልማት ሥራ ድጋፏን እንደምትቀጥል ገልጸው÷ ሀገራቱ በግብርና፣ ታዳሽ ኃይል እና ዘላቂ ልማት መስኮች በትብብር ለመሥራት በኮፕ 29 መድረክ የፈረሙትን ስምምነት በማሳያነት ጠቅሰዋል።

ያደጉ ሀገራት የአየር ንብረት ለውጥን ለመከላከል ለታዳጊ ሀገራት ቃል የገቡትን የገንዘብ ድጋፍ ተፈጻሚ እንዲያደርጉ ኢትዮጵያ እያቀረበች ላለው ጥሪም ሀገራቸው ተግባራዊ ምላሽ በመስጠት ድጋፍ እንደምታደርግ አረጋግጠዋል፡፡

በወንደሰን አረጋኸኝ