የሻምፒየንስ ሊግ ጨዋታዎች ዛሬ ምሽት ይቀጥላሉ

አዲስ አበባ፣ ጥቅምት 26፣ 2017 (ኤፍ ቢ ሲ) የአውሮፓ ሻምፒየንስ ሊግ የምድብ አራተኛ ዙር ጨዋታዎች ዛሬ ምሽት ሲካሄዱ ሪያል ማድሪድ ከኤሲሚላን እና ሊቨርፑል ከባየርሊቨርኩሰን የሚያደርጉት ፍልሚያ ይጠበቃል፡፡

ምሽት 2 ሠዓት ከ45 ላይ የሆላንዱ ፒኤስቪ ከስፔኑ ዢሮና እንዲሁም የስሎቫኪያው ስሎቫን ብራቲስላቫ ከክሮሺያው ዳይናሞ ዛግሬብ ይጫወታሉ፡፡

በሌላ የጨዋታ መርሐ-ግብር ምሽት 5 ሠዓት ሳንቲያጎ ቤርናባው ላይ ሪያል ማድሪድ ከኤሲሚላን የሚያደርጉት ጨዋታ ከፍተኛ ትኩረት ስቧል፡፡

እንዲሁም የመርሲሳይዱ ሊቨርፑል ከባየርሊቨርኩሰን ጋር የሚያደርጉት ጨዋታ ተጠባቂ ሲሆን÷ አሰልጣኝ ዣቪ አሎንሶ በተጫዋችነት ወደ ነገሰበት አንፊልድ አቅንቶ የቀድሞ ክለቡን በአሰልጣኝነት ይገጥማል፡፡

በተመሳሳይ ምሽት 5 ሠዓት ላይ የጣሊያኑ ቦሎኛ ከፈረንሳዩ ሞናኮ፣ ቦሩሲያ ዶርትሙንድ ከኦስትሪያው ስቱርም ግራዝ፣ የስኮትላንዱ ሴልቲክ ከጀርመኑ አር ቢ ሌይብዚግ ፣ የፈረንሳዩ ሊል ከጁቬንቱስ እንዲሁም የፖርቹጋሉ ስፖርቲንግ ሊዝበን ከማንቼስተር ሲቲ ጨዋታቸውን ያደርጋሉ፡፡