አዲስ አበባ፣ ጥቅምት 23፣ 2017 (ኤፍ ቢ ሲ) የደረሱ ሰብሎች ወቅቱን ባልጠበቀ ዝናብ እንዳይበላሹ ጥንቃቄ በማድረግ በፍጥነት መሰብሰብ እንደሚገባ የግብርና ሚኒስቴር አሳስቧል፡፡
ሚኒስቴሩ ጉዳዩን አስመልክቶ ባወጣው መረጃ÷ እንደ ሀገር በሁሉም አካባቢዎች እየታየ ያለው የሰብል ቁመና የተቀመጠውን ምርትና ምርታማነት እድገት ደረጃ ሊያሳካ በሚችል ሁኔታ ላይ እንደሚገኝ አመልክቷል፡፡
የተቀመጠውን ግብ ሙሉ ለሙሉ ለማሳካት የድህረ-ምርት ብክነትን መቀነስ የሚያስችሉ የቅድመ-ጥንቃቄ እርምጃዎችን በመተግበር ሰብሉ ያለምንም ብክነት ተሰብስቦ ወደ ጎተራ መግባት እንዳለበት አስታውሷል፡፡
በአሁኑ ወቅት በኢትዮጵያ በተለያዩ አካባቢዎች ወቅቱን ያልጠበቀ ዝናብ እየጣለ መሆኑን የጠቆመው ሚኒስቴሩ÷ ዝናቡ በደረሱ ሰብሎች ላይ ጉዳት ሳያደርስ በፍጥነት መሰብሰብ እንደሚገባ አስገንዝቧል፡፡
በአንዳንድ አካባቢዎች የደረሱ ሰብሎችን የተለያዩ ዘመናዊ የምርት መሰብሰቢያ ማሽነሪዎችን በመጠቀም ምርት እየተሰበሰበ መሆኑን ጠቅሶ÷ ይህ ተግባር ተጠናክሮ እንዲቀጥል ጠይቋል፡፡
በየደረጃው የሚገኙ የግብርና ቤተሰቦች እና የዘርፉ ባለሙያዎች አርሶ አደሮችን በመደገፍ የደረሱ ሰብሎች ሳይባክኑ እንዲሰበሰቡ ትብብር እንዲያደርጉም ጥሪ አቅርቧል፡፡