የሥርዓተ ምግብ ተግባራትን ከገጠር ልማት ኮሪደር ጋር ማስተሳሰር እንደሚገባ ተገለጸ

አዲስ አበባ፣ ጥቅምት 20፣ 2017 (ኤፍ ቢ ሲ) የምግብ ሥርዓት እና ሥርዓተ-ምግብ ተግባራትን ከገጠር ልማት ኮሪደር ጋር በማስተሳሰር መምራት እንደሚገባ የደቡብ ምዕራብ ኢትዮጵያ ሕዝቦች ክልል ርዕሰ መሥተዳድር ነጋሽ ዋጌሾ (ዶ/ር ኢ/ር) ገለጹ፡፡

በክልሉ የምግብ ሥርዓት እና ሥርዓተ-ምግብ መዋቅራዊ አደረጃጀት ለመፍጠር የሚያስችል የንቅናቄ መድረክ በቦንጋ ከተማ ተካሂዷል፡፡

ርዕሰ መሥተዳድሩ በዚሁ ወቅት በምግብ ሥርዓት እና ሥርዓተ-ምግብ የተከናወኑ ተግባራት በተሻለ ደረጃ መሻሻሎች የታዩበት መሆኑን ተናግረዋል።

በክልሉ የምግብ ሥርዓት እና ሥርዓተ-ምግብ ማስተባበሪያ በማቋቋምና የአማካሪ ካውንስል በማደራጀት ተጨባጭ ለውጦች መኖራቸውንም ጠቅሰዋል፡፡

ፕሮግራሙ መቀንጨርንና ሞትን መቀነስ ብሎም በቤተሰብ ደረጃ የምግብ ዋስትናን የማረጋገጥ ተልዕኮ ያለው ስለሆነ÷ ከገጠር ኮሪደር ልማት ጋር በማስተሳሰር መምራት እንደሚገባ አሳስበዋል፡፡

በክልሉ በተከናወኑ ተግባራት ለውጦች ይኑሩ እንጂ እየተስተዋለ የሚታየው የመረጃ ጥራት ክፍተት በትኩረት ሊቀረፍ እንደሚገባም አስረድተዋል፡፡

በመድረኩ የብዝኃ ሴክተር የምግብና ሥርዓተ -ምግብ ፕሮግራም የ2016 በጀት ዓመት አፈጻጸም ፣ የፕሮግራሙ መዋቅራዊ አደረጃጀት ለመፍጠር የተዘጋጀ ሠነድና በማስተባበሪያ ጽሕፈት ቤቱ የተከናወኑ ሥራዎች ቀርበው ውይይት መደረጉን የክልሉ ኮሙኒኬሽን ቢሮ መረጃ አመላክቷል፡፡