አዲስ አበባ፣ መስከረም 30፣ 2017 (ኤፍ ቢ ሲ) የአዲስ አበባ ከተማ አስተዳደር ከንቲባ አዳነች አቤቤ በደቡብ ኮሪያ በተካሄደው የሴኡል ስማርት ሲቲ 2024 ምርጥ አመራር ሽልማት አሸናፊ በመሆን እውቅና ተበረከተላቸው፡፡
ከንቲባ አዳነች በዓለም አቀፍ ደረጃ ከ72 ሀገሮችና 115 አቻ ከተማ አስተዳደር ከንቲባዎች መካከል በስማርት ሲቲ ንቅናቄ ከፍተኛ ውጤት በማስመዝገባቸው ለአሸናፊነት መብቃታቸው ተገልጿል፡፡
ከንቲባዋ የመዲናዋን ነዋሪዎች ህይወት ለማሻሻልና የከተማዋን መሰረተ ልማት ለማዘመን ባሳዩት ቁርጠኝነትና ባስመዘገቡት ውጤት ለሽልማት መብቃታቸው በሽልማቱ አዘጋጆች መገለጹን የከንቲባ ጽ/ቤት መረጃ አመላክቷል፡፡
ሽልማቱን በተመለከተ ከንቲባ አዳነች አቤቤ ባስተላለፉት መልዕክት፤ ለህዝባችን ሰርተን በምናገኘው እውቅና ሁሉ ተመስጋኙ ከጎናችን በመሆን የልማቱ ዘዋሪ እና ተጠቃሚ የሆናችሁ የከተማችን ነዋሪዎች መሆናችሁን ላረጋግጥላችሁ እወዳለሁ ብለዋል።