አዲስ አበባ፣ ነሐሴ 11፣ 2016 (ኤፍ ቢ ሲ)ላለፉት 3 ወራት ከአስደናቂ ተወዳዳሪዎቹ ጋር አብሯችሁ የቆየው የፋና ላምሮት የምዕራፍ 17 የድምፃዊያን ውድድር ዛሬ ፍፃሜውን አድርጓል።
ለፍፃሜው የደረሱት አራቱ ተፎካካሪዎች (አብርሃም ማርልኝ፣ ሱራፌል ደረጀ፣ ናሆም ነጋሽ እና ጴጥሮስ ማስረሻ) ዛሬ በ3 ዙር የመረጧቸውን ሙዚቃዎች ከኮከብ ባንድ ጋር አቅርበዋል።
በደማቅ ስነ-ስርዓት በተካሄደው በዚህ የፍፃሜ ውድድር ላይ አንጋፋው ድምፃዊ ጌታቸው አስፋው በእንግድነት ተገኝቷል፡፡
በዚህ የምዕራፍ 17 የፍፃሜ ውድድር ጴጥሮስ ማስረሻ አንደኛ በመውጣት 400 ሺህ ብር ሲሸለም ናሆም ነጋሽ ሁለተኛ ደረጃን በመያዝ 300 ሺህ ብር፣ ሱራፌል ደረጀ ሶስተኛ በመሆን 200 ሺህ ብር እንዲሁም አብርሃም ማርልኝ 4ኛ ደረጃን በመያዝ የ100 ሺህ ብር ሽልማት አግኝቷል፡፡
አራቱም ተወዳዳሪዎች በቀጣይ አመት ለሚደረገው ለ5ኛው የአሸናፊዎች አሸናፊ ውድድር በቀጥታ ማለፋቸውን ከወዲሁ አረጋግጠዋል።