1 ሺህ 445ኛው የኢድ አል አድሃ (አረፋ) በዓል ሰኔ 9 ቀን 2016 ዓ.ም በእስልምና እምነት ተከታዮች ዘንድ በድምቀት ይከበራል፡፡
በዓሉን ምክንያት በማድረግም በአዲስ አበባ ስታዲየምና በዙሪያው እንዲሁም በአቃቂ ቃሊቲ አና በሌሎች ክ/ከተሞች ላይ በሚገኙ መስጂዶች ለሚከናወነው የኢድ ሶላት ስነ-ስርዓት የፀጥታ አካላት ለሚያከናውኑት የፀጥታ ስራ ምዕመናኑ ተባባሪ እንዲሆን ግብረ ሃይሉ ጠይቋል፡፡
የኢትዮጵያ ፌደራል ፖሊስ ወንጀል መከላከል ጠቅላይ መምሪያ አዛዥ ምክትል ኮሚሽነር ጀነራል መላኩ ፋንታ፣ የአዲስ አበባ ከተማ ሰላምና ፀጥታ አስተዳደር ቢሮ ኃላፊ ወ/ሮ ሊዲያ ግርማ እና የአዲስ አበባ ፖሊስ ኮሚሽነር ጌቱ አርጋው÷ የፀጥታ ኃይሉን ቅድመ ዝግጅት አስመልክቶ በተደረገው ውይይት እንደ ከዚህ ቀደሙ የህዝቡን አቅም በተገቢው መጠቀም እንደሚገባ ተገልጿል፡፡
ምክትል ኮሚሽነር ጀነራል መላኩ ፋንታ በሰጡት የስራ መመሪያ በህብረተሰቡ ውስጥ ተመሳስለው የሚገኙትን ፀረ-ሰላም ኃይሎች የመመንጠሩ ስራ እንዲሁም በዘረፋ፣ በሌብነት እና በሌሎች ወንጀሎች ላይ የተሰማሩ ህገ-ወጦች ላይ የተጀመረው ኦፕሬሽን ተጠናክሮ ይቀጥላል ብለዋል።
በዓሉ በሰላም እንዲከበር ሁሉም በተሰማራበት የፀጥታ ስራ ኃላፊነቱን እንዲወጣም ጥብቅ የስራ መመሪያ ሰጥተዋል፡፡
የአዲስ አበባ ከተማ ሰላምና ፀጥታ አስተዳደር ቢሮ ኃላፊ ወ/ሮ ሊዲያ ግርማ በበኩላቸው መላው የከተማዋ ነዋሪዎች የፀጥታውን ስራ በመደገፍ በኩል እያበረከቱ ያሉትን አስተዋፅኦ አጠናክረው እንዲቀጥሉ ጥሪ አቅርበዋል፡፡
የሰላም ሰራዊት አባላት ለከተማችን ሰላም እየተወጡት ያለውን ድርሻ በማጎልበት ለበዓሉ ሰላማዊነት ከፀጥታ አካሉ ጋር ተቀናጅተው እንዲሰሩ አቅጣጫ ተሰጥቷል ብለዋል፡፡
በያዝነው ዓመት በአዲስ አበባ ከተማ ህዝብ በስፋት ወደ አደባባይ በመውጣት ያከበራቸው ኃይማኖታዊና ብሔራዊ በዓላት ካለምንም የፀጥታ ችግር መከበራቸውን የአዲስ አበባ ፖሊስ ኮሚሽነር ጌቱ አርጋው አስታውሰዋል፡፡
ይህ ውጤት የተገኘው የፀጥታው ኃይሉ ከህብረተሰብ ጋር ተቀናጅቶ በመስራቱ እንደሆነም ጠቅሰዋል፡፡
ከህብረተሰቡ ጋር በመስራታችን ወንጀልን ለመከላከል እና አጥፊዎችን ህግ ፊት ለማቀርብ እያገዘን ስለሆነ የህብረተሰቡ እና የፀጥታ አካላት ጥምረት እንዲጎለብት ትኩረት ተሰጥቶበት እየተሰራ መሆኑንም ኮሚሽነሩ ገልፀዋል፡፡
በአዲስ አበባ ስታዲየምና በልዩ ልዩ መስጂዶች ከሚደረገው የሶላት ስነ-ስርዓት በተጨማሪ በክፍለ ከተሞች ለሚከናወነው የኢድ ሶላት የሚመጡ ምዕመናን ለጋራ ደህንነት ሲባል ፍተሻ ስለሚኖር ህብረተሰቡ ይህንን ተገንዝቦ የተለመደ ትብብሩ እንዲያደርግ መልዕክቱን ያስተላለፈው የጋራ ግብረ ሃይሉ፤ ለመላው የእምነቱ ተከታዮችም በዓሉ የሰላምና የደስታ እንዲሆን መልካም ምኞቱን ገልጿል፡፡
ለስራው ስኬታማነት ህብረተሰቡ እያደረገ ላለው ትብብር ግብረ ኃይሉ ምስጋናውን አቅርቦ ጥቆማ ለመስጠትም ይሁን የፖሊስን አገልግሎት ለማግኘት በስልክ ቁጥር፡-
• 011-5-52-63-03
• 011-5-52-40-77 መጠቀም እንደሚቻል የአዲስ አበባ ፖሊስ መረጃ ጠቁሟል።