አዲስ አበባ፣ ሚያዝያ 29፣ 2016 (ኤፍ ቢ ሲ) በአውሮፓ ሻምፒየንስ ሊግ ለፍፃሜ ለማለፍ በሚካሄደው የግማሽ ፍፃሜ የመልስ ጨዋታ የፈረንሳዩ ፓሪስ ሴን ዠርሜ (ፒ ኤ ሲ ጂ) እና የጀርመኑ ቦሩሲያ ዶርትሙንድ የሚያደርጉት ፍልሚያ ይጠበቃል፡፡
ጨዋታው ምሽት 4 ሠዓት ላይ በፒ ኤስ ጂ ሜዳ ፓርክ ዴስ ፕሪንስ የሚከናወን ይሆናል፡፡
ባለፈው ሳምንት የተካሄደውን የመጀመሪያ ጨዋታ ዶርትሙንድ በሜዳው 1 ለ 0 ማሸነፉ ይታወሳል፡፡
በነገው ዕለት ደግሞ በመጀመሪያው ዙር የግማሽ ፍጻሜ ጨዋታ አሊያንዝ አሬና ላይ 2 አቻ የተለያዩት ሪያል ማድሪድና ባየርንሙኒክ የመልስ ጨዋታቸውን በማድሪድ ሳንትያጎ ቤርናቢዩ ላይ ያደርጋሉ፡፡
ዛሬ እና ነገ የሚካሄዱትን የደርሶ መልስ ጨዋታዎች ያሸነፉ ቡድኖች ለፍጻሜ እንደሚፋለሙም ከመርሐ-ግብሩ ለማወቅ ተችሏል፡፡
የዘንድሮው የፍፃሜ ጨዋታ በፈረንጆቹ ሰኔ 1 ቀን 2024 በእንግሊዝ ዌምብሌይ ስታዲየም ይካሔዳል።