አዲስ አበባ፣ ሰኔ 26፣ 2014 (ኤፍ ቢ ሲ) ጀግኖች ደማቸውን ሰጥተው ያስከበሯትን ሀገር በመስዋዕትነታችን እናስቀጥላለን ሲሉ በሰሜን ምዕራብ ዕዝ የሚገኙ ሜካናይዝድ እና የእግረኛ ክፍለ ጦር የሰራዊት አባላት ተናገሩ፡፡
በክፍለ ጦሩ የሚገኘው የ2ኛ ሬጅመንት አዛዥ ሻለቃ አለምነው ተፈራ እንደገለጹት÷ ሰራዊቱ ተልዕኮውን እና አላማውን በሚገባ የሚያውቅ፣ በወታደራዊ ስነ ምግባር የተገነባ በመሆኑ ማንኛውንም ግዳጅ የሚፈፅመው አሰራሩን እና ደንቡን በመከተል ነው፡፡
ሰራዊቱ ወታደራዊ ሳይንስና ጥበብን በሚገባ እንዲላበስ በስልጠና በማብቃት÷ የሀገሩን ሉዓላዊነት በመስዋትነቱ የሚያስከብር አመራርና አባላት ፈጥረናል ማለታቸውን የመከላከያ ሰራዊት መረጃ ያመላክታል፡፡
የኢትዮጵያን ድንበር ለመድፈር እና ሰላሟን ለማወክ የሚሯሯጡ የውጭም ይሁን የውስጥ ፀረ ሰላም ኃይሎችን ለመደምሰስ÷ ሰራዊቱ ከምንጊዜውም በላይ በአስተማማኝ የዝግጁነት ደረጃ ላይ ይገኛል ብለዋል፡፡
በሜካናይዝድ ክፍለ ጦር የአየር መቃወሚያ ምክትል አዛዥ ሻለቃ መኳንንት ደርብ በበኩላቸው÷ የሜካናይዝድ አባላቱ ከእግረኛ ክፍለ ጦር ጋር በመቀናጀት የሀገር ሉዓላዊነት እንዳይደፈር ሌት ተቀን ዝናብና ብርዱ ሳይበግራቸው የግዳጅ ቀጣናቸውን እየጠበቁ ነው ሲሉ ገልጸዋል፡፡
የሰራዊቱ አባላት በሰጡት አስተያየት÷ ጀግኖች ደማቸውን ሰጥተው ያስከበሯትን ሀገር በእኛ መስዋትነት ተከብራ እንድትቀጥል በማንኛወም ጊዜ የሚሰጠንን ግዳጅ በድል ለመወጣት ዝግጁ ነን ብለዋል።
ዘወትር ከእኛ ጋር ስላሉ እናመሰግናለን!