በአነስተኛ ኢንዱስትሪ የምግብ ዘይት ሲያመርቱ የቆዩ ተቋማት ከገበያ እንዳይወጡ ባለድርሻ አካላት ሊተባበሩ እንደሚገባ ተገለፀ

የኢትዮጵያ ኢንተርፕራይዝ ልማት ምክትል ዋና ዳይሬክተር አቶ ጳውሎስ በርጋ÷ በአነስተኛ ኢንዱስትሪ ዘይትን አምርተው ለተጠቃሚዎች ሲያቀርቡ የቆዩ ተቋማት የፋይናንስና ቴክኒካል ድጋፍ በሚፈለገው ደረጃ እየተደረገላቸው እንዳልሆነ ተናግረዋል ።

የፋይናንስ ተቋማት የተጓተቱ የቢሮክራሲ አሰራሮችን ቀልጣፋ በማድረግ ሊያግዟቸው ይገባል ያሉት አቶ ጳውሎስ በርጋ ወደ ውጭ ተልከው የውጭ ምንዛሬ የሚያስገኙ የቅባት እህሎች ለዘይት አምራቾች በስፋት የሚቀርቡበት መንገድ ሊመቻች እንደሚገባም አብራርተዋል ።

የኢትዮጵያ ኢንተርፕራይዝ ልማትም ጉዳዩ በፖሊሲ ዙሪያ እንዲታይ ከባለድርሻ አካላት ጋር እየሰራ እንደሆነም ጠቁመዋል ።

ፋና ብሮድካስቲንግ ኮርፖሬት ያነጋገራቸው የዘይት አምራች አነስተኛ ኢንዱስትሪዎች የግብዓት አቅርቦት እንዲሁም የድጋፍ ጥያቄ ማቅረባቸው ይታወሳል ።

መንግስትም ለዘርፉ በቂ ትኩረት ቢሰጠው የሃገር ውስጥ ፍጆታን ለመሸፈን ጥረት ማድረግ ይቻላል ብለዋል ።

ከፍተኛ የስራ እድልን መፍጠር እና የውጭ ምንዛሬን ማስቀረት እንደሚቻልም ባለሃብቶቹ አመላክተዋል።

በአወል አበራ